Virgin Voyages ta cancela bishita crucero dialuna na Aruba pa tension na Venezuela

ORANJESTAD – Compania crucero Virgin Voyages a cancela su bishita plania na Aruba dialuna, debido na e situacion tenso na Venezuela. Esaki a wordo confirma pa director Marc Figaroa di Aruba Ports Authority. Segun Virgin Voyages, e redderia no ke tuma ningun riesgo na e region caribeño na e momento aki. Pa awor, e anulacion aki ta e prome y unico cu e autoridad di puerto a ricibi. Otronan companianan di cruise ta sigui e desaroyonan cu cuidou, pero ainda no a tuma ningun desicion tocante cancela bishitanan. E anulacion ta yega na un momento delicado pa Aruba, cu ta den medio di e temporada di cruise mas druk cu e isla a conoci. Diario varios barco di cruise ta yega na e isla. Ora un barco no yega, esaki tin consecuencia directo pa sector turistico y pa e economia local. Virgin Voyages, fundacion na 2014 y estableci na Florida, tin desde september 2025 cuatro barco di cruise cu capacidad di mas o menos 2.700 pasahero pa cada barco. E prome barco di e compania, Scarlet Lady, a cuminsa na 2021 cu cruise for di Miami, principalmente riba ruta cortico den e region caribeño. Aruba Ports Authority ta bisa cu nan lo sigui monitorea e situacion di serca y ta mantene contacto cu industria di cruise internacional tocante cualkier consecuencia adicional pa e temporada di cruise.