Aruba ta conoce su prome dos mortonan di trafico pa 2026

ORANJESTAD – Apenas 5 dia cu aña a habri, Aruba a conoce su prome dos mortonan di trafico caba pa 2026. Diadomingo pa 11:58 di anochi Central di Polis a wordo notifica di un accidente pisa riba L.G. Smith Blvd na altura di Wind Creek Casino unda un auto modelo SUV color preto a alcansa dos peaton y a sigui core bay.Central di Polis a despacha patruya y ambulance na e sitio di e sucedido cu maximo urgencia. Personal di ambulance a yega na e sitio y a duna asistencia medico na tur dos victima pero lamentabelmente no por a haci nada mas pa nan. Specialista di trafico, Dr Forensico y polis technico tabata presenta pa cuminsa nan investigacion, y departamento di slachtofferhulp tambe a presenta pa duna assistencia na e famia di e fayecidonan. 

BUSKEDA PA E AUTO Y CHAUFFEUR

Tambe mesora Polisnan a cuminsa cu un buskeda pa cu e auto cu a dal e dos personanan y na un adres na Bushiri ta bin topa cu e auto y ta bay over na detene un chauffeur femenino.Na e sitio Dokter Voskuil ta constata morto di e pareha:  Josely Paulina Vasquez Gonzalez naci riba 09-07-1960 na Republica Dominicana y  Carlos David Vialez Valerio naci riba 19-10-1971 na Republica Dominicana. 

Esaki ta bira e prome y di dos morto den trafico. Un caso hopi tristo y lamentabel cu nos ta habri awe dialuna. 

HIT & RUN

Cuerpo policial a pone enfasis esaki no ta manera, esta di dal hende mata y core bay. “Para y keda na e sitio di accidente. E victimanan aki ta ser humano y nan tambe tin famia. Mester sigui reglanan di trafico pa un trafico sigur”, Cuerpo di polis a sigui bisa.  Noticiacla y Cuerpo Policial Aruba ta manda palabra di condelencia na famia di e fayecidonan.