Trump ta claim captura di presidente Venezolano Maduro y ta confirma atakenan

WASHINGTON -  Presidente Mericano Trump ta claim cu na Venezuela nan a captura presidente Maduro hunto cu su casa. Esaki a pasa pa medio di unidadnan militar specialisa di Estados Unidos. Segun e informacion, tanto Maduro como su esposa a wordo saca for di e pais.

E vicepresidenta Venezolana Rodriguez ta bisa cu e lugar unda Maduro y su esposa ta keda ta desconocido. Riba television di estado, e la bisa cu e kier mira prueba cu nan ta biba ainda. Rodriguez tambe a reporta cu militarnan y civilnan a muri durante e atakenan Mericano. Un numero oficial di muerto ainda no a wordo publica.

Ministro di Defensa Padrino ta bisa cu Venezuela lo opone su mes contra presencia di tropa for di pais. El a anuncia un “despliegue masivo” di tropa militar. El a bisa esaki den un mensaje di video cu ta circula riba rednan social. “Venezuela libre, independiente y soberano ta rechasa presencia di e tropanan aki cu no a laga nada mas cu morto, dolor y destruccion.”

TRUMP TA CONFIRMA ATAKENAN

E viceministro Mericano di Asuntonan Exterior ta bisa cu Maduro “finalmente lo wordo yama na responsabilidad pa su crimenan”, segun agencia di noticia Reuters. Trump mes tambe a confirma cu Estados Unidos ta tras di e atakenan riba Venezuela. Segun e presidente, Merca a ehecuta “un atake exitoso y di gran escala” contra Venezuela y su lider. Estados Unidos lo a ataca, entre otro, un compleho militar y un aeropuerto militar. E ministro Venezolano di Asuntonan Exterior ta bisa cu den algun di e atakenan tambe area no militar a wordo afecta.