Analisis: Otro aña ta pasa bay, otro aña ta drenta! Y nos tey keto bay!

Scirbi pa Tito Laclé

 Faltando algun ora pa nos clausura aña 2025, y pa nos drenta di loke ta bay bira e di 12 aña di existencia di Noticiacla,  ta un bon momento pa refleha riba e aña, y mas importante, gradici ABO pa bo sosten como lector, y ABO como comerciante cu a sigui kere den Noticiacla den e aña cu ta bay laga nos. En general, e aña tabata uno hopi positivo, pero claro, semper cu algo reto aki aya. Creatividad, resiliencia y determinacion ta cosnan cu ta necesario den momentonan asina, pa sigura continuacion di un meta noble y importante: Informa bo comunidad den e miho forma, di loke realmente ta necesario. Y manera cu Noticiacla for di inicio a ranca sali, ta sigui usa e mesun formula, esta di filtra loke tin, publica loke ta real, y duna ABO e noticia cu ta importante. Cu rednan social creciendo di un forma explosivo, e ta crea tambe e oportunidad pa hende publica mas y mas cos, cu segun nan, ta noticia. Y e ta haci nos trabou mas ‘interesante’ y ‘necesario’ pa ta e filtro pa mantene bo riba e caminda corecto di kico ta berdad y kico no. 

Manera ta conoci, nos, como cualkier medio electronico, no a scapa di e maldad di ‘hacking’, y ta recuperando un aña despues ainda di esaki. Nos no tey ainda di loke nos a ‘perde’, pero nos a sa di mantene e base firme, produci contenido importante, cu tambe a percura cu pa 2026, comercio a bolbe mustra su confiansa pa cu e portal noticioso aki. Practicamente tur a keda fiel y ta sigui den 2026 cu e sosten commercial y ta duna nos e forza pa sigui pa dilanti durante un aña mas. 

Pa ABO, e lector cu tambe ta fiel, mi kier a gradici ABO pa esey. No ta facil awendia. Escogencia tin hopi, y asina mes, ABO a dicidi den 2025 di continua scoge nos como un medio importante pa bo haya bo informacion. Noticiacla tin su estilo: Selectivo, informativo, pero garantisa di ta veridico mas cu tur cos, y esey ta haci nos e diferencia. 

Kico por spera den 2026? Fuera di lo comun, por spera mas inovacion, unda cu Inteligencia Artificial tambe a haci su entrada. Ademas, tin mas empeño pa programanan informativo, manera Noticiacla LIVE, mas video, y asina por sigui. Noticiacla nunca a para keto, semper a inova y ta usa e technologia mas nobo semper pa bin dilanti. Na number di nos comerciantenan, DANKI, na ABO cu ta keda cu nos den 2026. Na nos comerciantenan cu ta sigui cu nos den 2026, DANKI, pa e confiansa y sosten!. FELIZ AÑA!! BENDICION Y TUR COS BON DEN 2026!