Ucrania kier un zona demilitarisa na Donetsk como parti di plan di paz

DONETSK - Presidente Zelensky a bisa huristanan cu e ta dispuesto pa hala e tropanan di Ucrania for di region Donetsk, si Rusia tambe entrega un parti comparable di teritorio ey. Asina por forma un area demilitarisa, cu segun Zelensky mester ta parti di un acuerdo di paz cu e por  cera cu Rusia.

Un forsa militar internacional lo mester mantene tur dos ehercito separa den e zona buffer ey. E ciudanan importante pa Ucrania, Kramatorsk y Slovjansk, segun Zelensky tambe lo mester keda den e area ey. l tambe a pone como condicion cu e habitantenan di Ucrania mester duna nan aprobacion via un referendo pa e retirada for di Donetsk.

E conkista di e region ey ta uno di e obhectivonan di guerra mas importante di presidente ruso Poetin. Rusia ya tin e mayoria grandi di e region bou su control. Te awor Zelensky no tabata kier entrega e teritorio cu keda, entre otro motibo pasobra Ucrania ta considera e area ey necesario pa e defensa di e pais.