Corsou, Aruba y Hulanda kier entrega keho na Merca pa violacion di espacio aereo

WILLEMSTAD / ORANJESTAD - Corsou hunto cu Hulanda y Aruba, kier entrega un keho formal na Merca tocante e violacion di e aira di e isla caribeño pa avionan militar. Asina e portal di noticia Luchtvaartnieuws.nl ta raporta.   E forzanan arma di Merca ta hopi activo den e region pa motibo di e tensionnan cu ta subi entre Merca y Venezuela. Den e contexto aki, tin varios barconan di marina, incluyendo un portavion, y tambe avionan di combate, avionan di reconocimiento, dronenan y bombarderonan cu ta ejecuta misionnan den e area. Un avion Airbus di JetBlue a casi choca cu un avion di repostaje den ayer, mientras cu tambe un avion di negocio a logra evita un botsing na ultimo momento. Segun informacion, esaki a pasa pasobra e avionan militar no tabata tin nan transponder prendi y no tabata mantene contacto cu e control di trafico aereo di Corsou.

KEHO FORMAL

E autoridad di aviacion di Merca, FAA, a declara e aira riba Venezuela cerra pa aviacion civil, pa motibo di e actividad militar aumentada. Sinembargo, e aire controla pa Venezuela ta pega directamente na esun di Corsou, unda diariamente hopi vuelo comercial y di vacacion ta pasa. Corsou ke cu e avionan militar di Merca respeta e reglanan internacional di aviacion, incluyendo prende nan transponder y mantene contacto cu e control di trafico aereo, pa asina evita situacionnan peligroso den futuro.