Ministerio Publico na Hulanda no ta apela sentencia den caso di Marco Borsato

AMSTERDAM - Ministerio Publico na Hulanda no lo bai den apelacion den e caso contra Marco Borsato. E cantante a wordo absolvi dos siman pasa di acusacion di conducta indecente cu un mucha muhe di 15 aña. Segun e huez, no tabatin prueba suficiente pa confirma e acusacion, y   Ministerio Publico ta spera cu tin solamente un chance hopi chikito cu Borsato lo wordo condena den apelacion.

Ministerio Publico a pidi un castigo di prizon di cinco luna contra Borsato, pero cu e decision pa no sigui cu apelacion, e proceso huridico contra e cantante di 58 aña ta yega definitivamente na su fin.

Abogado Peter Plasman, cu ta asistiendo e muhe cu a entrega e denuncia contra Borsato, no ta contento cu e decision di e Ministerio Publico. “Naturalmente e absolucion tabata un decision decepcionante pa mi cliente,” e la bisa. “Ministerio Publico ta sigui convenci di e credibilidad y confiabilidad di su declaracionnan. Esaki ta hasi cu ta tristo cu nan ta lag’e na mita di e proceso. Husticia a cuminsa e trayecto y awor ta tristo cu nan ta kit’e for di dje.”