Vanddis BV ayera na Corsou a pidi bancarota di Lovers Industrial Corporation BV

WILLEMSTAD  - Ayera Vanddis BV a entregá petishon di bankarota di e kompania Lovers Industrial Corporation BV na korte di hustisia. Ku pena na kurason gerensia di Vanddis B.V. a hasi entrega ayera di un petishon di bankarota di e kompania Lovers Industrial Corporation B.V. na Korte di Kòrsou.

E desishon drástiko aki a wòrdu tumá despues di konsiderashonnan intensivo i kouteloso di tur e diferente alternativanan. Segun e informashon di Vanddis BV, den e último añanan a hasi tur lokual tabata posibel i na alkanse pa garantisá kontinuidat di e kompania Lovers. No opstante e esfuersonan inmenso ku a wòrdu hasí, Lovers a haña su mes den un situashon kaminda ku e no por dispone riba su propio fondonan despues ku akshonistanan minoritario (representá dor di Cindy van der Dijs i Oswald van der Dijs) a laga pone embargo riba tur e kuentanan bankario di e kompania, basá riba un ‘claim’ monetario enorme, kual ‘claim’ Lovers no ta rekonosé.

Esaki a hasi imposibel pa Lovers por sigui ku operashon di e kompania di un forma responsabel.

Ta importante pa suprayá ku e paso aki no ta un refleho di e forsa di sobrebibensia di e kompania Lovers. E kompania entretantu, despues di añanan difísil, ta un kompania operashonalmente salú, ta disponé di un modelo di negoshi sólido i ta wòrdu kargá dor di empleadonan dediká na nan tareanan. Dor di e embargo, Lovers sinembargo ta wòrdu impedí di por paga su obligashonnan.

Ku esei, petishon di bankarota di e kompania a bira e úniko alternativa pa asina evitá mas daño i tambe pa duna klaridat na empleadonan, suplidónan, klientenan i otronan enbolbí.

Vanddis ta lamentá e sirkunstansianan enormemente, pero ta trankil debí ku e desishon a wòrdu tumá basá riba un sentido di responsabilidat profundo den direkshon di tur ku ta enbolbí ku e kompania. Banda di esei, Vanddis ta ekspresá e speransa ku e kurator ku ser apuntá dor di Korte lo investigá e posibilidat pa hasi un ‘doorstart’ di Lovers, mirando e operashon salú di e kompania. NOTA: E texto ta scirbi den papiamento fonetico di Corsou. Potret cortesia Antiliaans Dagblad.