Gobierno ta contribui cu 1 miyon florin di fondo di ATA pa renobacion di Cas di Cultura

ORANJESTAD— Minister di Turismo  Wendrick Cicilia a anuncia dialuna cu gobierno a aproba e alocacion di 1 miyon florin for di Aruba Tourism Authority (ATA) pa sostene renobacion di Cas di Cultura, un di Aruba su puntonan di referencia cultural mas tesoro. Segun e mandatario, e contribucion aki ta representa un inversion significativo den e herencia cultural di nos isla y ta refleha e compromiso continuo di Gobierno pa sigura cu ta reinverti e beneficionan di turismo den preserva y celebra e identidad autentico di Aruba. 

MESTER MAS PLACA

Mientras cu awor gobierno a anuncia 1 miyon mas (e gobierno anterior a compromete su mes caba cu 4 miyon:red) y ademas Cas di Cultura ya caba a sigura partnershipnan y sponsornan fuerte pa sostene e proyecto ambicioso aki. Gobierno di Aruba, het Cultuurfonds Hulanda, Water- en Energiebedrijf Aruba (WEB), y Aruba Hotel & Tourism Association (AHATA) tur a compromete pa hunga un rol pa haci ‘E Brasa’ un realidad. Aruba Investment Bank (AIB) a compromete pa sostene e parti importante di maneha e fondonan di renobacion recauda di un manera resposabel y transparente. E suma total cu Cas di Cultura mester, ta 17 miyon florin, cu a keda anuncia na comienso di e aña aki.