Na Corsou hoben di 18 ta keda asesina den fin di siman

WILLEMSTAD - Un hóben a keda asesiná djasabra último, den oranan lat di anochi den Dein. Polis no a identifiká e hóben ainda, pero segun nos informashonnan, ta trata di un mucha hòmber di ménos ku 18 aña. Segun e informe di polis, djasabra dia 13 di desèmber den kareda di dies pa 12 di anochi Sentral di Polis a dirigí unidat di warda di polis di Rio Canario pa Dein na altura di un trùk di pan, despues ku informashon a drenta di un kaso di tiramentu ku persona heridá. Na yegada di e promé unidat, a topa un hòmber drumí abou riba su barika i no tabata duna señal di bida.  A pidi ambulans ku a presentá na e sitio, pero ya e personal no por a hasi nada mas pa e víktima.

For di investigashon preliminar realisá, a sali na kla ku un ratu promé, un vehíkulo pretu modèl chikí a pasa i okupantenan di e outo aki a lòs tiru riba e hòmber ku a alkans’é mortalmente. Despues e outo den kua e sospechosonan tabata, a move den direkshon di Kanga. NOTA: Texto ta scirbi den papiamento fonetico di Corsou.