‘Arquitectonan di IA’ scogi pa Time Magazine como Persona di Aña

NEW YORK – E revista internacionalmente conoci como Time Magazine a scogi ‘arquitectonan di IA’ como Persona di Aña. Segun e revista, 2025 tabata e aña den cual “e potencial completo di inteligencia artificial a sali na caminda den un manera hopi fuerte, y a bira cla cu no tin caminda pa bolbe atras.” E revista a scogi ocho figura prominente den sector di IA pa un di e dos portada, pasobra nan “trabou pionero” ta anucia un epoca tecnologico nobo. Entre nan tin Mark Zuckerberg (Meta y Facebook), Elon Musk (xAI), Jensen Huang (Nvidia) y Sam Altman (OpenAI). Riba e portada, e ocho ta sinta banda di otro riba un balki halto den aire, cu un skyline di ciudad grandi patras. Esaki ta referi na e potret iconico di aña 30, unda trahadonan di construccion tabata sinta come riba un balki di staal durante construccion di Rockefeller Center na New York. Riba e otra portada ta e palabra ‘AI’, traha for di piesa di computer y rodea cu scaffoldnan.