Pais Aruba no tin cu paga ningun multa na desaroyador arubiano

ORANJESTAD – Pais Aruba no a perde ningun multa den un conflicto cu un desaroyador arubiano, tocante e prolongacion di un derecho di erfpacht. Asina e Hof di Husticia di Reino a determina den apelacion. E empresario a bisa cu Pais a actua laat y incompleto ora di tuma desicionnan tocante un proyecto di construccion, pero e no a haya razon den su argumentacion. E caso ta trata di un tereno na L.G. Smith Boulevard, pa cual e desaroyador ta desde 2016 a haci varios peticion pa cambia e destinacion pa construccion di un compleho grandi di apartamento cu tienda. Den november 2023 Pais Aruba a rechasa esnan. Poco despues e drecho di erfpacht tambe a caba riba e tereno. Na april 2024, e huez den proceso corto a determina cu Pais a actua demasiado laat y a obliga Pais pa tuma desicionnan dentro di termino fija tocante cambio di destinacion y prolongacion di erfpacht. Na esaki a wordo imponi un multa di 10.000 florin pa dia, cu un maximo di mei medio miyon florin.

CONTRATO DI ERFPACHT NOBO

Pais Aruba despues a tuma desicionnan y den mei 2024 a propone na e desaroyador un contrato di erfpacht nobo pa un periodo di sesenta aña. Empresario a nenga di firma e contrato debido na obhecion contra e condicionnan. Despues dje, e la bisa cu Pais tabaa perde multa y el a intenta cobra esaki. Tanto e Corte den prome instancia como e Hof no tabata di acuerdo cune. Segun e Hof, e meta di e sentencia anterior tabata solamente pa obliga Pais Aruba pa tuma desicion na tempo y pa colabora cu un acte di erfpacht cu ta corresponde cu esnan. Pais Aruba no tabata obliga pa cambia condicionnan ni pa drenta den negociacion cu e empresario. Pasobra Pais Aruba formalmente a cumpli cu e ordennan di huez, segun e Hof, ningun multa no ta necesarfio. E empresario por lo tanto no por ehecuta ningun cobransa. E sentencia di prome instancia ta wordo confirma completamente den apelacion. Ademas, empresario mester paga 2.000 florin di gastonan di proceso na Pais.