- Le Lanchon: Gaia House of Grill ta Aruba su ‘upscale’ restaurant mas nobo di Aruba
- Prijs di gasoline ta habri aña cu un reduccion considerabel diaranson
- Cantante Julio Iglesias (82) acusa di violacion y explotacion di empleadonan hoben
- Tres shen studiante caribeño lo ricibi guiamento adicional pa nan estudio na Hulanda
- Rey Willem-Alexander: ‘Hulanda y Corsou lo yega leu na Mundial’
Gobierno a inicia un proceso pa desaroya e tereno di Refineria di San Nicolas
ORANJESTAD - Gobierno di Aruba, den presencia di ministernan Geoffrey Wever y Arthur Dowers, a duna inicio formal na un siman crucial di trabou pa determina e futuro di e area unda cu refineria ta ubica. E proceso aki ta yega na un momento esencial pa Aruba, despues di hopi aña di inactividad industrial y cu hopi expectativa tanto economico como social den comunidad di San Nicolas. Den nan introduccion, Minister Wever y Minister Dowers a enfatisa cu desaroyo di un tereno asina grandi, compleho y industrialmente carga ta rekeri un enfoke profesional, guia pa expertonan local y internacional. “Nos ta trata cu un tereno cu pa hopi decada a wordo utilisa pa actividad industrial. Esaki ta bin cu desafionan significante pa re-usa e area of dun’e un proposito nobo. Nos ta kere cu tur paso mester tuma luga den un forma responsabel, sigur y transparente, sigurando cu nos ta traha cu e expertonan correcto pa guia Aruba den e direccion corecto y necesario.”
Durante e “kick-off session”, un grupo amplio di experto y representante di instancia gubernamental y tecniconan tabata presente, incluyendo RDA, DEZHI, DNM, DOW, DIP, TWO–Aruba y TWO–Nederland, representantenan di Minister-Presidente Mike Eman, representantenan di Minister Herde, representantenan di Minister Wever, Minister Dowers y Minister Croes, hunto cu expertonan Arubiano y representantenan di e empresa cu ta opera actualmente parti di e tereno.
Industria petrolero tin un historia cu risiconan ambiental y Gobierno ta compromete pa evalua e situacion na un manera responsabel. Mester evalua kico por wordo usa den un forma sigur, kico no por, y con pa crea un desaroyo duradero cu ta proteha nos medio ambiente y ta contribui na desaroyo economico real pa Aruba.
Gobierno ta pone enfasis riba importancia di restablece futuro economico pa San Nicolas: “Pa hopi hende grandi den San Nicolas, e refineria tabata un simbolo di un era. Aworaki un era ta caba, y nos tin e obligacion pa comunica claro cu comunidad di San Nicolas kico ta e futuro di e tereno.”
Minister Dowers y Minister Wever tambe a referi na e mocion aproba den Parlamento na peticion di Parlamentario De Meza, cu ta rekeri un formula nobo pa e uso di e tereno.
“E refineria a contribui hopi aña na crecemento economico di Aruba. Aworaki, despues di su ceramento, mester yega na un otro uso duradero y strategico. E proceso cu ta cuminsa aworaki ta un respuesta directo na compromiso gubernamental pa cumpli cu e mocion aki,” e minister Wever a splica.
E reunionnan di e siman aki tin como meta pa entrega un Terms of Reference claro y completo, cu lo juda Gobierno di Aruba pa busca y contrata e mihor consultantnan pa guia e desaroyo di e proyecto.
CEO nobo di aeropuerto a yega Aruba y reuni cu minister
ORANJESTAD – Despues di un retraso chikito debi na problema di buelo (relaciona cu mal tempo na Europa), e CEO nobo di Aeropuerto, Johnny Andersen a yega Aruba porfin y a cuminsa traha. Minister di Turismo mr. Wendrick Cicilia responsabel pa aeropuerto, a tene un reunion oficial cune, como parti di e proceso di introduccion y alineacion strategico despues di su reciente nombracion. Minister Cicilia tabata compaña pa Tico Croes y Philippe La Reine, y miembronan di Hunta di Comisario di Aruba Airport Authority encabesa pa Marion Kan, hunto nan a forma parti di e reunion. Durante e reunion a trata topiconan clave relaciona cu maneho di aeropuerto, desaroyo di aeropuerto den futuro, conectividad aereo y importancia di aeropuerto como un pilar fundamental di turismo y economia di Aruba.
Dowers: Aruparking lo takel auto di esnan cu a surpasa ora di parkeer
ORANJESTAD – Autonan cu a pasa nan ora di parkeer paga, por haya nan mes mal sirbi door di haya nan auto getakeld, y cu tin cu cubri tur gasto di esaki. Minister encarga cu husticia, y bou di cual ta cay tambe Aruparking, Arthur Dowers, a duna un briefing cortico dialuna riba e situacion aki. Segun e mandatario, durante e ultimo 3 lunanan, a parti 375 multa pa esnan cu tabata parkeer robez tur caminda. Y a takel 150 auto cu tabata stroba trafico, creando un peliger.
Gobierno ta entrega ley ‘Langdurige Zorg Aruba’ pa nos grandinan
ORANJESTAD - Prome Minister Mike Eman durante e programa Noticiacla LIVE a comparti cu durante e celebracion di 25 aña di existencia di AZV, hunto cu Minister di Salubridad, Asunto Social, Cuido di Hende Grandi y di Adiccion, Mervin Wyatt-Ras, a anuncia un ley nobo. Ta trata di e Landsverordening Langdurige Zorg Aruba.
Gobierno ta introduci startersregeling pa stimula empresanan nobo
ORANJESTAD - Den cuadro di un strategia pa stimula empresanan nobo y diversificacion di Aruba su economia Minister di Finansa, Economia y Sector Primario Geoffrey Wever ta introduci oficialmente un “Startersregeling” pa companianan nobo, dirigi na elimina barrera fiscal pa empresanan nobo y crea un clima fiscal mas faborabel pa empresanan nobo.
Eman: Refineria na Aruba definitivamente ta keda cera
ORANJESTAD – E refineria na Aruba ta keda cera. Y ni cu e desaroyo nobo na Venezuela, esaki no ta cambia. Asina prome minister Mike Eman a bisa durante e programa Noticiacla LIVE na Tito Laclé. Laclé a puntra e mandatario si mirando e desaroyo nobo na Venezuela unda cu ta parce cu Merca ta den control di e petroleo, cu si esaki ta pone gobierno di Aruba pensa dos biaha riba e plan pa e refineria. E refineria a cera su portanan algun tempo atras, y Eman a sigura cu esey lo keda asina. Tabatin un periodo di gloria di e refineria, pero esaki awor a caba y definitivamente e refineria ta keda cera.
Dowers: Polis a señala cu situacion di trafico a bay for di man na Aruba
ORANJESTAD – “Polis a señala situacion di trafico (na Aruba) practicamente a bay for di man na pais Aruba”. Asina minister di husticia di Aruba Arthur Dowers a bisa diabierna mainta durante un reunion di Parlamento contestando pregunta di parlamentarionan. E reunion tabata a base di peticion di un parlamentario (John Hart di AVP) riba e tema di seguridad di trafico despues di un fin di siman tragico unda cu 3 persona den dos diferente accidente a perde nan bida cruelmente.
Follow NoticiaCla
