Avionnan di guera mericano a bula den espacio aereo di Venezuela pa 40 minuut

CARACAS - Dos avion di combate F-18 di Merca a bula rond di Golfo di Venezuela cerca Maracaibo pa mas o menos 40 minuut, y asina a subi e tension entre e dos paisnan. E portal Miami Herald a raporta esaki diamars atardi.  Diamars merdia, dos avion F-18 di Merca a bula hunto den formacion y a drenta espacio aereo di Venezuela como demostracion di poder contra regimen di Nicolas Maduro. E vuelo desafiante tabata pasa menos cu 100 milla norteoost di Maracaibo, di dos ciudad mas grandi di Venezuela. Miles di Venezolano tabata sigui e avionnan online via website di rastreo  specialisa, mirando cu nan tabata bulaun patron manera dos dashi riba golfo. E avionnan a keda den espacio aereo Venezolano pa minimo 40 minuut na un altura di mas o menos 25.000 pia prome cu nan a bula norte y sali for area. E avion di combate di Merca a bula entre dos region importante pa sector energia di Venezuela: estadonan Zulia y Falcon. Lago Maracaibo, cu mas cu 5.000 milla cuadrado, ta un di e mas grandi grupo di awa fresco den continente, y ta tene rond 150 bilyon barril petroleo.

Segun dato di FlightRadar24, e rastro di vuelo ta mustra cu e avionnan a bula riba banda norte di Lago Maracaibo, riba awa di Golfo di Venezuela, entre ciudanan di La Guajira (Zulia) y Coro, capital di Falcon. E demostracion militar di Merca ta yega na un momento cu Washington ta sigui amplia su presencia militar den Caribe, y ta haci tension cu Caracas bira mas grandi. Lider Venezolano Nicolas Maduro ta acusa administracion di Trump cu ta prepara “acto di agresion” bou e tapa di operacion anti-narcotico.

Venezuela a reacciona na e despliegue mas grandi di Merca den decada den region, segun analistanan:

A declara estado di emergencia

A activa su fuerza armaa y milisia Bolivariano

Y a mustra un sistema anti-aereo cu hopi capa (aunke no semper ta funciona pareu)