Situacion den region a pone premier Eman cancela su bishita pa Hulanda

ORANJESTAD – Prome minister Mike Eman a cancela su biahe pa Hulanda e siman cu ta bin. Noticiacla a raporta di e bishita ayera, unda cu hunto cu dos prome minister di Corsou y St Maarten, e lo a biaha pa Hulanda. E fin di siman aki un delegacion di Aruba lo a sali pa Hulanda pa atende un serie di temanan importante. Prome Minister mr. Mike Eman tabata riba programa pa duna un di e principal lecturanan riba relacionan den Reino  dia 9 di december durante Inter Expo-Koninkrijk, hunto cu entre otro Ministernan di Estado Balkenende y Hirsch Ballin.  

Tambe Prome Minister Eman lo a tene reunionan cu principalnan di formacion di un gobierno nobo na Hulanda. Riba programa ta tambe firmamento di un acuerdo nobo cu Schiphol. 

PAKICO A CANCELA

E situacion den region y responsabilidad di Prome Minister mr. Mike Eman pa dirigi e preparacionan y evaluacionan di e scenarionan den region a pone Minister President Eman yega na e decision aki (di cancela su bishita). Minister President mr. Mike Eman ta bisa cu no tin informacion specifico di kico lo por pasa of cu lo pasa of ki dia, pero cu e tension ta palpable y nos tin un responsabilidad na cas na e momentonan aki den coordinacion cu autoridadnan di Relacionan Exterior y Defensa di Reino y nos instancianan local”.  No ta conoci si e otro premiernan tambe ta cancela nan biahe, of si nan si ta sigui cu di nan.