Na Corsou, director di supermercado grandi a menasa su famia cu arma y haya retiro immediato

WILLEMSTAD – Director statutario di e cadena grandi di supermercado na Corsou, Goisco, Joel Jose da Silva Goes, ayera den oranan laat di mainta a menasa un miembro di su famia den e negocio di Goisco na Schottegatweg. Esaki a provoca cu e la haña retiro immediado manera director estatutario di e compania. Segun informacion, e desicion aki no tin ningun efeco riba funcionamiento normal di e negocio.

Segun report di Polis, 3 di december 2025 rond 11:49 ora, central di Polis a manda un unidad na un establecimiento na Schottegatweg Noord pa un caso di menasa.

Ora cu Polis a yega, a sali  na cla cu tabatin un problema familiar cu a acaba den un menasa cu arma di fuego. Na e sitio Polis a   confisca un arma di fuego.

Mesora tabata detene e homber J.J.D.S.D.G. di 59 aña, nase na Corsou, pa menasa i violacion di lei di arma di fuego.

E sospechoso a presenta dilanti di un fiscal auxiliar, cu a ordena su encarcelamento mientras cu investigacion ta sigui.

RETIRO COMO DIRECTOR A YEGA PRONTO

No a tuma hopi tempo pa un comunicado di bufete Braam & Pols a yega, informando riba e desicion tuma:

Joel Jose da Silva Goes no ta director estatutario mas di Goisco.

Segun e informacion di abogado, Goisco ta anuncia cambio den directiva, cu e consecuencia cu Da Silva Goes ta perde su cargo immediado y lo termina e relacion laboral cu e tin cu e compania.

E desaroyonan reciente tocante su detencion pa posecion ilegal di arma a yuda pa e desicion cay lihe.

Segun representacion legal di e negocio, esaki no ta afecta funcionamiento diario di Goisco, pasobra Da Silva Goes ya pa un bon tempo no tabata completamente activo den operacionnan diario.

Gerencia ta keda di focus riba clientenan, trahadonan y partnernan, cu meta pa sigui duna servicio y calidat manera ta acostumbra.