AFTA: Mercado di Aruba ta den man di algun distribuidor so

ORANJESTAD – Mercado di importacion y distribucion na Aruba ta domina pa poco empresa cu ta controla e mayoria di fluho di mercancia cu ta yega na isla. Esaki ta sali den estudio di mercado mas recien di Aruba Fair Trade Authority (AFTA), cu ta describi e sector como oligopolistico.

Segun AFTA, e concentracion aki ta concede algun distribuidor  grandi un posicion fuerte den formacion di prijs y disponibilidad di producto. E autoridad ta bisa cu e  structura di mercado aki ta laga poco espacio pa competencia y empresa nobo casi no por drenta, pasobra costo di inversion ta halto, mercado ta chikito y tin relacionnan fuerte cu suministrador for di afó.

Dominacion di algun distribuidor ta afecta tur cadena. Pasobra acceso na marca regularmente ta pasa exclusivamente via un solo importador, detailhandelnan ta haña dificil pa bira pa otro suministrador. Esaki ta causa poco presion riba precio di marca y pone consumidor depende pa un man di empresa so.

AFTA ta enfatisa cu oligopolio no ta necesario contra regla di competencia, pero den un economia chikito manera Aruba e por trece risconan pa libertad di escoho y prijs cu por paga. Pesey, e autoridad ta anuncia investigacion adicional tocante posicion di poder y practica cu por ta excluyente den sector aki. Lesa e rapport completo AKI.