AFTA: Regulacion di prijs pa Canasta Basico no ta traha manera mester

ORANJESTAD – Canasta Basico, e lista cu productonan basico cu gobierno ta regula nan prijs, no ta protehe consumidor di un manera efectivo. Esaki ta conclusion di Aruba Fair Trade Authority (AFTA) den nan estudio di mercado mas reciente tocante  structura di distribucion y formacion di prijs riba e isla. Segun AFTA, e sistema no ta reacciona suficiente ora prijs internacional baha. Pesey productonan ta keda mas largo cu necesario cu prijs halto riba rekki. Ademas, segun investigacion, regulacion ta wordo evita den practica, pasobra importadornan y distribuidornan ta structuralmente cambia nan prijs di cumpra diferente for di loke regla ta basa riba dje. Ora asina, comerciantenan por sigui pone prijs mas halto cu loke e regla di Canasta ta pidi.

AFTA ta indica cu Canasta Basico, cu un dia a wordo introduci pa protehe casnan vulnerabel contra subida di prijs, no ta cumpli cu su funcion mas manera mester. E autoridad di vigilancia ta conseha gobierno pa cambia e sistema na su fundeshi, drenta un proceso pa baha cu regulacion, of reemplasa esaki cu un metodo di proteccion cu ta sigui miho cu situacion di mercado awendia.

E evaluacion tocante Canasta Basico ta parti di un estudio mas amplio den cual AFTA tambe ta mustra cu tin competencia limita, hopi obstaculo pa empresa nobo drenta mercado y gran diferencia di precio entre supermercado chikito y grandi. Por lesa e rapport completo AKI.