• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis | Con Venezuela lo reacciona si tin un atake di Merca?

Scirbi pa Dick Drayer 

KRALENDIJK – E advertencia di presidente di Merca Donald Trump cu mester considera e espacio aereo riba Venezuela como “completamente cerra”, ta marca segun Reuters un escalacion nobo den tenshonan entre Washington y Caracas. Luna pasa, Merca a haci decenas di atake mortal riba botonan cu segun Trump tabata hiba cocaina. E ta sugeri tambe cu e operacionnan por bira accion militar riba tereno Venezolano. E pregunta central ta: con Venezuela lo reacciona si e atake realmente yega?

APARATO MILITAR DEBILITA

Segun seis fuente cu a papia cu Reuters, e ehercito Venezolano ta na un posicion suak. Mal entrenamiento, salario abou — pago ta cien dolar pa luna — y arma Rusonan bieu ta haci cu e forza no tin capacidad pa confronta e poder militar di Merca. Desertacion ta sosode den varios departamento militar y por aumenta si tin un atake. Venezuela tin avion di combatimento Sukhoi y helicopter Rusonan, tanki y raket di defensa aerea, pero hopi di nan ta bieu. Aunque e  base di poder di Maduro ta depende hopi di lealtad di oficialnan — pasobra militar nan tin posicion clave den gobierno — den practica diario e ehercito ta mas ocupa cu mantene orden interno y confrontacion cu demonstrantenan no arma.

GUERRILLA COMO  STRATEGIA PRINCIPAL

For di plan interno y declaracionnan di hende involucra ta sali cu Venezuela no ta conta cu defensa convencional si Merca  ataca, pero cu un acercamiento tipo guerrilla. Unidad militar chikito ta wordo dispersa na mas cu 280 ubicacion na e pais y nan ta ricibi orden pa haci sabotage y otro accion di desestabilizacion. E  strategia ta wordo nombra como prolonged resistance — un resistencia largow cu mester haci cu algun intervencion por bira caotico y costoso. Uso di raket aereo Igla ta parti di esaki. Segun un fuente, comandonan militar ya a haya orden pa dispersa y sconde mes si tin un atake, pa hasi e mando central dificil pa elimina.

UN SEGUNDO SCENARIO: ‘ANARCHISACION’

Aparte di accionnan tipo guerrilla, tin segun fuente un segundo plan cu no ta wordo reconoci oficialmente: desestabilisa Caracas for di paden. E  strategia — nombra internamente como anarchisacion — ta depende riba servicio di inteligencia y grupo arma fiel na gobierno. Meta di esaki ta: crea tantisimo desorden cu e capital ta bira ingobernable, asina cu ningun pais stranhero por sigui construi un base di poder despues di un intervencion.

OTRO HUGADORNAN ARMA

Na banda west di Venezuela ta operando guerrillanan Colombiano manera ELN. E tambe tin grupo arma  pro-gobierno nombra colectivos, cu hopi bez ta sali den motor convoy durante protesta.  Opposicion y observadornan internacional ta acusa departamentonan di gobierno y ehercito di tin lazo cu cartel di droga, algo cu Caracas ta nega fuertemente. Gobierno ta sostene cu Washington kier cambio di regimen pa haya acceso na e petroleo Venezolano.

E ADVERTENCIA DI TRUMP Y SU EFECTO INMEDIATO DEN REGION

E advertencia di presidente di Merca cu e espacio aereo Venezolano ta “completamente cerra” tin efecto inmediato den region. E islanan ABC, solamente algun kilometer for di costa Venezolano, ta fuera di e espacio aereo Venezolano — pero no fuera di e shock geopolitico.

CONFLICTO CERCA DI CAS

Un confrontacion militar entre Merca y Venezuela lo tuma luga casi inmediato den e espacio di awa y aire entre continente Sudamericano y Corsou, Aruba y Boneiru. Merca ta haci operacionnan contra contrabando di droga for di esaki mes area hopi aña. Barconan y avion di patruya di Merca ta opera regularmente cerca di e islanan, y ta causa cu e risiconan ta cerca di comunidadnan insular. E buelo reciente di un B-52 Americano banda di costa Venezolano, visible for di e isla ABC, ta mustra e cercania. Mes cos pa e advertencia di autoridad aereo di Corsou tocante trafico aereo no-identifica na area di aproximacion.

CONEXION AEREA VULNERABEL

Aviacion ta e lifeline di e islanan. Turismo, comercio, evacuatienan medico, bishita familiar — tur ta depende di corredor aereo stabil. Esaki ta pone escalacion regional hopi sensitivo. Buelo europeo y mericano ta bai bon tur ora, pasobra nan ta evita espacio venezolano ya hopi tempo. Pero conexion cu Suriname y otro pais Sudamericano ta wordo afecta duro. Ruta nan mester bira mas largo pa evita Venezuela, cu mas gasto di gasolin y mas costo operacional.

Si escalacion sigui — por ehempel si Venezuela activa defensa aerea of guerrillanan ta opera for di costa — corredor aereo por wordo move mas ainda. Tin risico cu companianan lo bira menos frecuente of menos directo. Esaki por aisa e economia di e islanan.

INQUIETUD RIBA E ISLANAN

Aun cu e islanan no ta blanco di Venezuela, pueblo ta sinti su mes vulnerabel. Tin raportahe cu algun residente a cuminza acumula provision, otro ta considera bai temporalmente for di e isla si esituacion escala. Señalnan ta chikito, pero ta mustra incertidumbre creciente. E  strategia militar di Venezuela — guerriya, sabotage y desestabilisa Caracas — ta apunta principalmente intermamente. Pero instabilidad na Venezuela semper tin efecto regional: migracion, cera frontera, interrupcion di mercancia y preshon geopolitico riba e islanan. Un escalacion nobo lo intensifica esakinan.

RIESGO MAS AMPLIO: UN BISIÑA DI SUR INGOBERNA

Si Venezuela drenta den un defensa tipo guerrilla prolonga, e pais lo destabilisa mas ainda. Esaki por crea mas fluho di refugiado den region Caribense, mas risiconan di seguridad banda di frontera maritimo, y un presencia mas fuerte di Merca serca di e islanan. Pa Corsou, Aruba y Boneiru esaki ta nifica: no un amenaza militar directo, pero si un period di turbulencia geopolitico largu banda di nan porta.

CONCLUSION

Mientras Venezuela por eligi pa sabotage y resistencia tipo guerriya contra un atake di Merca, e islanan ABC ta encontra nan mes den banda di e teatro di confrontacion. Nan vulnerabilidad mas grandi no ta militar, pero aviacion, dependencia economico y estabilidad social. Loke ta pasa na Venezuela, nunca ta keda solamente banda otro banda di e laman Caribense.