Awe ta ultimo dia di trabou di director di ATIA, Herrick Henriquez

ORANJESTAD – Noticiacla a compronde cu awe ta ultimo dia di trabou di director di Aruba Trade & Industry Association ATIA, Herrick Henriquez. Segun Henriquez na Noticiacla, e ta bay pa un otro reto pa 2026. Pa loke ta su reemplasante, esey no ta determina ainda, ya cu e proceso ta den e ultimo ronda di entrevista pa logra haya e persona cu awor lo bay dirigi ATIA. 

HENRIQUEZ

Henriquez a drenta den servicio di ATIA dia 1 di maart 2021, esta 4 aña pasa. Durante e periodo ey, e la sa di solidifica e asosacion di tal forma cu e voz cu e tabatin, a bira mas fuerte. Su conocemento di materia tabata sinigual, y semper fuerte y al caso. E nunca a sconde su pensamento como director di ATIA ni como persona. Tur tema, e tabata domina, y tabata lidera tambe ariba. E la sa di inova e asosacion, su imagen fisicamente, y tambe structuralmente, pa asina e asosacion keda cu tempo. Cu prensa, semper e tabatin un coneccion sublime, por lo menos cu noticiacla, y no tin nada malo di bisa di sr Henriquez. 

FUTURO

Pa loke ta su futuro, Henriquez no tabata cla pa divulga kico e ta bay haci ni unda e ta bay. Loke ta conoci si, ta cu e ta bay traha y posiblemente lidera otro compania aki na Aruba mes. Noticiacla ta desea sr Herrick Henriquez tur cos bon cu su cambio y futuro.