NCTV: ta confirma cu email di parlamentario(nan) di Aruba a keda gehacked

ORANJESTAD – Den Cybersecuritybeeld Nederland 2025, ta confirma oficialmente pa prome biaha cu e cuentanan di email di un of mas parlamentario arubiano a keda gehacked. Asina e portal aruba.nu ta raporta diabierna. Segun e Nacional Coordinator pa Combate di Terrorismo y Seguridad (NCTV), e incidente ta mustra cu e institucionan politico den parti di Caribe di Reino ta hopi vulnerabel pa atakanan digital. E raport ta menciona e entrada ilegal manera un incidente cyber notabel den region di Caribe. Den esaki, hende no autoriza a haya acceso na mailbox di miembro di Staten di Aruba. Si informacion sensitivo a bira bisto of roba, e documentonan di NCTV no ta revela. Pero e organizacion ta pone e atake den un contexto mas amplio di un amenaza digital cu ta sigui aumenta contra e islanan.

INFRASTRUCTURA BIEU

NCTV ta indica cu e paisnan den Caribe no solamente ta sinta cu infrastructura bieu, pero tambe cu un grado mas halto di dependencia digital y requisito di seguridad menos stricto cu Hulanda europeo. Directivanan europeo manera NIS2, cu ta obliga gobierno y empresa pa tene nan resistencia digital na ordo, no ta aplica riba Aruba, Corsou y Sint Maarten. Esaki ta causa falta di un marco huridico hopi fuerte pa exigi proteccion di sistemanan di ministro, miembro di Staten y dependencia gubernamental.