Fraccion MEP: Vice Presidente di Parlamento Muzanin Wever mester baha!

ORANJESTAD – Fraccion di partido MEP dialuna a pidi pa retiro di e vice presidente di Parlamento Muzanine Wever. Dialuna ultimo, Parlamento a trata presupuesto 2026 pa Parlamento. Durante e reunion cada parlamentario di MEP tabata hopi critico riba e vice presidente Muzanin Wever riba su actitud dictatorial siman pasa. 

Segun Parlamentario Edgard Vrolijk, e la mustra cuanto articulo di nos Constitucion Muzanin Wever a viola. Parlamentario Shailiny Tromp-Lee a subraya cu e actitud dictatorial ta un accion inaceptabel y ta un manipulacion. Parlamentario Rocco Tjon   a bisa tambe cu ki bal nos aproba e presupuesto si nos mes no ta balora nos mes, referiendo na e hecho cu e fraccionnan di AVP y Futuro no ta respeta regla. Parlamentario Endy Croes tambe a condena e falta di transparencia di e vice presidente di parlamento. 

Parlamentario Hendrik Tevreden a finalisa bisando cu Parlamento mester “walk the talk”, specialmente den exigi pa respeta democracia. Den su disertacion parlamentario Evelyn Wever-Croes a conclui cu e actuacion di Muzanin Wever tabata contra ley y ta inaceptabel, y mester tin consecuencia pa esaki. Mesora el’a pidi un reunion di e lidernan di fraccion pa delibera riba e consecuencianan.