Europa a bin cu propuesta contra e plan americano pa Ucraina

BRUSELAS- Paisnan europeo na Geneva a presenta un propuesta contra pa e plan di 28 punto di presidente americano Trump pa pone fin na e guera na Ucraina. Na e ciudad Suizo, tabata presente delegacion americano, ucraino y europeo pa bisa tocante e plan cu Trump a presenta durante e siman aki.

Segun agencia Reuters, e propuesta ta bin for di Reino Hulandes, Francia y Alemania. E propuesta europeo ta basa riba e plan americano, pero punto pa punto nan a cambia parti o a propone pa kita cierto cosa.

DIFERENCIA

E diferencia mas importante entre e dos plan ta tocante e limitacion propone pa cantidad di forsa arma ucraino y tocante entrega di territorio.

Den plan europeo ta propone pa limita ehercito di Ucraina “den tempo di paz” na 800.000 militar, en lugar di e limitacion general na 600.000 militar manera e estado americano ta propone.

Europa ta bisa tambe cu Ucraina no lo hinca forsa pa tuma bek territorio ocupa pa Rusia, y cu negociacion tocante posibel entrega di territorio mester pasa cu “linea di combate actual como punto di salida”. Den plan di 28 punto americano ta scibi cu cierto territorio ya mester wordo asigna na Rusia prome cu negociacion.

Un otro punto importante den propuesta europeo ta cu Ucraina mester ricibi garantia di seguridad for di Estados Unidos. E propuesta ta bisa explicito cu e tin cu ta den espiritu di articulo 5 di tratado NATO. Esei ta regla cu un atake militar contra un miembro di NATO, ta un atake contra tur miembro, y tur mester yuda otro.

Den e propuesta europeo tambe ta keda posibel cu Ucraina bira miembro di NATO si tur pais miembro ta di acuerdo (cu no ta e situacion actual). E punto americano cu “NATO no por amplia mas” a wordo kita. Tambe e propuesta ta inclui cu tin tropa di NATO y avion di combate estaciona na Polonia.