Comandante Eichelsheim: Preocupacionnan di Corsou ta hustifica pa motibo di inestabilidad na Venezuela

LEIDEN – Comandante di Forzanan di Defensa Onno Eichelsheim ta bisa cu preocupacionnan di Corsou ta comprensible mirando e tensionnan entre Mericanonan y Venezuela. E a bisa esaki recientemente durante un grabacion di College Tour e podcast, cu Twan Huys a haci hunto cu estudiantenan di Universidad di Leiden. "E Mericanonan a forma un forsa di combate cu ta mas cu loke bo mester pa combati droga. Nan no ta haci esaki pa nada." E Mericanonan ta reuni tropanan cerca di Venezuela. Den laman, menos cu cien kilometer for di Corsou, tin un gran portavion. Presidente Mericano Donald Trump ta acusa presidente Venezolano Maduro di dirigi un banda di droga y ta exigi pa e renuncia. Segun fuente di Reuters, Venezuela ta prepara pa un posibel invacion Mericano.

PERSPECTIVA VENEZOLANO

Eichelsheim ta enfatiza cu contacto Hulandes cu Venezuela ta hopi bon. Hulanda, segun e, ta transparente di movimientonan di su mes ehercito, pero tur movecion por parce for di banda Venezolano manera si Hulanda ta colaborando cu Mericanonan. Den e peor scenario, un atake Mericano por causa un reaccion Venezolano riba islanan Hulandes, den cua Venezuela por mira nos como parte di ofensiva Mericano.

Segun Eichelsheim, Hulanda tin suficiente capacidad pa proteha e islanan si situacion ta escala. Francia y Reino Uni ta partner den esaki, e ta bisa. Nos tin acuerdonan pa actua hunto. E ta tene tambe combersacion cu Mericanonan. Bo no por exclui nada, pero finalmente e reino ta e reino. Nos mester protehe dje y nos ta haci esaki ei tambe.