- Departamento di Relacionnan Exterior ta adverti pa no biaha of nabega pa Venezuela
- Corsou a keda selecta den grupo E, cu Alemania, Ecuador y Costa di Marfil pa mundial 2026
- Debi na crisis den region, prome minister di Corsou, Pisas tambe a cancela biahe pa Hulanda
- Sorteo mundial di futbol: Hulanda contra Japon, Tunez y un otro campion di play-off cu ainda no ta conoci
- Corte a dicidi: Dos ‘spiritonan’ den caso Flamingo mester paga placa bek
Lider di RAIZ ta pidi investigacion riba 200 miyon florin pa refineria
ORANJESTAD – Lider di RAIZ, Ursell Arends, ta pidi un investigacion riba 200 miyon florin arubiano cu e gobierno a libera entre 2017 y 2024 pa e refineria den San Nicolas. E ex-vicepremier a haci su yama dialuna atardi durante e programa Enfoke.
Arends ta dirigi su criticanan principalmente riba e gabinete Wever-Croes I y II. Su yamamento ta haya atencion adicional pa motibo cu ya tin un tension politico den MEP mes, entre otro, Glenbert Croes den caso Portulaca.
Segun Arends, e irregularidadnan posible riba e cantidad merese un tratamento serio.
DIRECTOR DI REFINERIA SUSPENDE
Tin un investigacion cu ta corriendo caba riba Refineria di Aruba (RdA). Director interino, Ricky Lacle – sobrino di ex-minister Glenbert Croes – a wordo suspende pa motibo di sospecha di irregularidadnan.
E minister a impone e suspencion despues di un raport. Segun ta wordo bisa, e investigacion por yega te na entrega di e caso na Ministerio Publico.
FALTA DI CLARIDAD RIBA ACUERDO CU CITGO
Segun Arends, e gobierno a contrata oficina di abogado Croes-Wever & Ruiz pa termina e contrato cu e compania mericano CITGO. “Premier Wever-Croes a presenta e accion aki como un gran exito: Aruba tabata tin “e yabi di e refineria bek”. Pero e no a menciona beneficio concreto pa e pais”.
Desde cu Exxon a laga Aruba, tabatin un obligacion contractual pa limpia e terreno di e refineria. E obligacion aki a pasa despues na Coastal, famia Wyatt, Valero y finalmente CITGO. CITGO tabatin cu reserva 320 miyon florin pa e limpiesa.
No ta cla con e obligacion aki a desaparece den e acuerdo cu Croes-Wever & Ruiz a logra cu CITGO. Ni ta papia mas riba e clausula aki ni riba e 320 miyon florin. Tambe no ta cla con CITGO a logra sali sin haci e limpiesa. E carga financiero awor ta keda riba gobierno arubiano, segun Arends.
Departamento di Relacionnan Exterior ta adverti pa no biaha of nabega pa Venezuela
ORANJESTAD - Diabierna atrobe, gobierno pa medio di DBB (Departamento di Relacionnan Exterior) a adverti pa no biaha pa Venezuela. Ministerio di Asuntonan Exterior di Reino Hulandes regularmente ta update su conseho di biahe pa Venezuela. Den e cuadro aki Departamento di Relacionnan Exterior di Aruba ta conseha pa tene cuenta cu e conseho di biahe aki, no biaha pa Venezuela y kier subraya pa evita e awanan teritorial Venezolano. E tensionan geopolitico ta sigui aumenta y ta intensifica e riesgonan di seguridad den cercania di e costanan Venezolano y den lama Caribe.
Gobierno y sindicatonan SIMAR, SEPPA y TOPA a firma restructuracion salarial di maestro
ORANJESTAD – Gabinete AVP-FUTURO y sindicatonan SIMAR, SEPPA y TOPA diabierna mainta a firma pa e prome fase di restructuracion salarial di maestro. Simbolicamente a firma e declaracion aki den e edificio historico di Algemene Rekenkamer cu ta Aruba su prome Scol Publico. Esaki como simbolo di e compromiso di Gabinete AVP-FUTURO pa cu e progreso di Pais Aruba por medio di enseñansa. Cu aprobacion di Presupuesto 2026, esaki lo wordo formalisa.
Situacion den region a pone premier Eman cancela su bishita pa Hulanda
ORANJESTAD – Prome minister Mike Eman a cancela su biahe pa Hulanda e siman cu ta bin. Noticiacla a raporta di e bishita ayera, unda cu hunto cu dos prome minister di Corsou y St Maarten, e lo a biaha pa Hulanda. E fin di siman aki un delegacion di Aruba lo a sali pa Hulanda pa atende un serie di temanan importante. Prome Minister mr. Mike Eman tabata riba programa pa duna un di e principal lecturanan riba relacionan den Reino dia 9 di december durante Inter Expo-Koninkrijk, hunto cu entre otro Ministernan di Estado Balkenende y Hirsch Ballin.
Minister Gerlien Croes na MEP riba deadline : Mi buchi tambe ta yena!
ORANJESTAD – Minister Gerlien Croes (Partido FUTURO) a contesta partido MEP diahuebs riba e ultimatum (deadline) cu e partido geel a pone p’e riba e biahe cu jet priva. MEP a pone e ultimatum pa e minister divulga con e la paga pa e jet priva pa Corsou recientemente. Croes sinembargo, riba su pagina di Facebook a bis’e cu e tin cu preocupa cu aangifte contra e partido mes. ‘Apreciabel comunidad di Aruba, mane nos ta bisa na papiamento crioyo "mi buchi tambe ta yena" e unico deadline cu Partido MEP y su lider Evelyn tawata tin ta 6 di december 2024, ora cu pueblo a fada di politiconan cu ta mal usa fondonan di pueblo” e ta cuminsa na bisa.
Wever-Croes: Deadline a pasa y awor ta bay denuncia minister Gerlien Croes
ORANJESTAD – Partido MEP ta bay entrega keho contra minister Gerlien Croes, awor cu e deadline cu a pone p’e, a vence. Manera ta conoci, dos siman pasa e partido a pone un ultimatum (deadline) pa e mandatario, relaciona cu e biahe cu e la haci pa Corsou recientemente, usando un avion priva pa esaki. Segun MEP, ta kier sa di e minister con esaki a bay, y ken a paga pa esaki. Pasobra nan ta sospecha cu cosnan a bay fout y cu esaki ta bira castigabel. A duna e mandatario dos siman, sino lo a entrega keho contra dje.
Mike Eman bay Hulanda pa congreso di 10/10/10 cu premiernan di Corsou y St Maarten
DEN HAAG – E premiernan di Corsou, Aruba i Sint-Maarten lo tuma for di 9 te 11 di december 2025 na 36e Congreso InterExpo den centro di prensa y debate Nieuwspoort na Den Haag. Tema central ta diesinco aña di cambio estatal for di 10 di october 2010. Dia 10 di october 2010, Antia Hulandes a wordo disolve Corsou y Sint-Maarten a ricibi status di pais banda den Reino. Bonaire, Sint-Eustatius y Saba a bira cuerpo publico di Hulanda mes dia ey. Awor diesinco aña despues, e cambio estatal aki ta den centro durante e congreso.
Follow NoticiaCla
