Ocho senador democrat a ‘bula cura’ y vota pa yuda pasa ley pa habri gobierno Mericano atrobe

WASHINGTON — Senado a pasa un legislacion dialuna anochi pa habri gobierno y pone fin na e ceramento mas largo den historia despues cu ocho Democratico a kibra linea di nan partido y a uni cu Republicanonan pa move e proceso dilanti.

E voto tabata 60-40, cu tur Republicanonan menos Sen. Rand Paul di Kentucky a vota na fabor di e medida.

E medida awor ta bai Cas di Representantenan, cu por vota diaranson pa pasa e pakete y manda e na presidente Donald Trump, cu a bisa dialuna cu e ta sostene e acuerdo bipartidario.

Senado a logra pasa e medida despues di un serie largo di voto pa rechaza algun amienda y combina tur e partinan di e acuerdo den un solo pakete.

E legislacion ta inclui un “minibus” cu tres ley di apropiacion anual completo, entre nan ta un financiamiento completo pa beneficionan di SNAP te fin di sieptembre proximo, y ta mantene gran parti di gobièrno habri pa un periodo cortico te 30 di januari.

Pero den un concesion importante pa Democraticonan, e acuerdo no ta inclui un extenshon di e subsidionan cu ta bai caba bou di Obamacare, o sea e Ley di Cuido Salud Asequible (ACA), despues cu Republicanonan a mantene firme contra continua e fondo aki. Eso ta nifica cu mas di 20 miyon Mericanonan por mira nan prima subi aña proximo.