MEP: Placa cu Hulanda ta duna pa energia, no ta nobo sino compromiso haci di 2023

ORANJESTAD - Den fin di siman minister presidente demisionario Schoof di Hulanda, tabata na Aruba y hunto cu Minister President di Aruba, a papia di e 100 miyon florin cu Hulanda lo inverti den transicion di energia na Aruba. Partido MEP rapidamente a recorda tur hende cu e acuerdo aki no ta algo nobo, indicando cu e no ta un logro di AVP, sino cu e ta un palabracion haci for di 2023 dianan 10, 11 y 12 di Mei, cu ex Minister Jetten, e tempo ey Minister voor Klimaat en Energie, durante e prome Caribbean Climate and Energy Conference (CCEC).

SHOWCASE

“Despues di esey e ex-Minister Jetten a informa e Voorzitter di Tweede Kamer cu gobierno di Hulanda ta sostene tur 6 isla den nan maneho di energia y pa nos islanan bira un showcase pa demas islanan chikito.E meta di e prome Caribbean Climate and Energy Conference (CCEC) tabata pa haya un mihor bista con Hulanda por asisti e 6 islanan den Caribe den e transicion di energia.” Lider di MEP, Evelyn Wever Croes a bisa.  “Mi ta hopi orguyoso cu e fondo aki ta bay wordo realisa. E conferencia a wordo organisa riba iniciativa di Aruba y ex minister Jetten. Durante su bishita na 2023, el a elabora cu e paisnan riba e fondo, y a informa cu lo ta entre 100 pa 200 miyon euro pa Aruba, Curaçao y Sint Maarten, y 30 miyon pa Boneiro, Saba y Sint Eustatius”.

Segun Wever-Croes, e fondo mester a wordo incorpora den 2024, pero a sufri tardansa. Den presupuesto di Hulanda 2026, cu a wordo entrega na september ultimo, e fondonan a wordo aloca. Awor tur cos ta cla pa entrante 1 di januari 2026 e proyectonan wordo ehecuta. Ademas Wever-Croes a bisa cu ta hopi importante pa subraya cu e fondo aki a bin disponible sin rijkswet”.