Corte: Caso unda 2 polis a tira y mata Ayden Lanoy, ta keda trata fin di februari 2026

ORANJESTAD – Bou di un vigilancia di seguridad sinigual diabierna mainta, Corte a trata e caso conoci como Caret cu ta trata di e dos agentenan policial  Violenes y Dirksz cu a tira riba e hoben Ayden Lanoy (19) y heride mortalmente, den forma conoci como regie. Esaki kier men cu no ta trata e caso integral, sino ta delibera pa sa kico falta y pa stipula un fecha pa e caso mes keda trata. 

POLISNAN PRESENTE

Notable tabata cu tur dos polis den e caso aki a presenta, cu nan respectivo abogado. Violenes tabata completo cu bachi y dashi y su colega Dirksz tabata mas casual. Ambos a presenta cu nan respectivo abogado, mientras cu pa parti di e famia di e victima, Lanoy, tambe tabatin nan propio abogado. 

HOPI SEGURIDAD

Tabata notable e cantidad di agentenan di seguridad presente den e sala principal (abou) y den tribuna (ariba) pa tratamento di e caso. Esaki tabata comprendibel mirando e tension cu tin ainda entre e diferente famianan. Pa e caso diabierna, a ubica e famia y conocirnan di e victima den e parti principal abou, rondona pa por lo menos 9 agente di seguridad di tanto KIA como CEA, mientras cu den e parti di tribuna (ariba), tambe tabata yen, pero cu famia di e agentenan policial. Aki tambe tabatin suficiente seguridad, por si acaso tabatin necesidad. 

HUEZ

For di comienso, huez a sigura pa e caso cana trankil, y a splica tur presente di e contenido, e embergadura, y e comprodemento cu e caso ta uno hopi dificil, hopi dramatico unda cu hopi emocion sigur lo bin ariba y cu tur esaki ta comprendibel. Asina mes e la suplica tur presente, cu pa bienestar di e caso, cu tur hende mester tene nan mes trankil, y cu si dado momento tin cu no por contene nan emocionan, nan por a bandona sala y bolbe ora cu nan recupera nan emocion. Ademas, a bira conoci cu e huez ya un dia anterior a delibera personalmente cu tanto famia di e victima como esnan di e polisnan riba e caso, pa asina adelanta e proceso. Asina mes, a trata varios asunto cu ainda tabata pendiente. 

NECESIDAD PA MAS INVESTIGACION

E proposito di un regiezitting, ta mas bien pa haya sa si tur investigacion ta cla, si tin peticion pa mas investigacion, scuchamento di testigo y mas punto. Loke a bira hopi cla liher, ta cu gran parti, si no ta henter e caso, ta drei rond di imagenan di video cu a keda colecta, y cu pa medio di e videonan aki, lo tin cu determina kico a sosode y mas importante, pakico. 

FISCAL

Fiscal a sigui cu su parti, unda cu den corto a resumi e cargonan cu tin contra e dos polisnan. Entre nan, ta uso di arma reglamentario di polis contra un individio, y subsidiariamente intento di homicidio (poging tot doodslag). 

PETICION DI ABOGADONAN 

A sigui peticion di e abogadonan di e dos polisnan unda cu a splica cu nan preocupacion ta cu tin dos set di imagen colecta,  di cual un set di imagen, e imagen ta sincronisa cu e audio, mientras cu un otro video esaki no ta e caso. Y cu nan kier pa documenta esaki corectamente pa  por usa e material aki y eventualmente cuestiona e discrepancia aki. Mirando e combersacionan cu a sigui entre huez, abogadonan y fiscal, tabata cla cu esaki lo ta bay ta e base di e caso, unda cu esaki mester sea proba of desaproba cu e cargonan contra e polisnan ta hustifica of no. Durante e tratamento diabierna, huez y fiscal a mustra cu tur investigacion ta completo, y cu tur material ta bon splica y disponible. Como tal, mesora a rechasa 2 peticion di e abogadonan, aunke cu mes momento a clarifica cu no tin necesidad di e peticion, ya cu tur material tey, y ta documenta caba y cu pues a cumpli de facto cu e peticion caba. Loke si huez a aproba 'nobo', contra deseo di fiscal, cu por usa un tercera partido pa conduci mas investigacion riba e caso. Huez a condiciona si cu e partido mester ta respetable y confiabel y cu tur investigacion cu falta, mester sosode den un tempo specifico y a palabra cu esaki lo termina prome cu fin di e aña aki. 

PAKICO VIDEO TA IMPORTANTE

A resulta cu durante e tratamento, cu basa riba e videonan, ta of por determina, of mester proba si e polisnan a actua corecto, y a tira corectamente si of no. Tin video cu ta mustra polisnan tirando riba e auto ora cu e ta back, (reverse) y tin cu ora cu e auto ta bay dilanti. Durante e caso, lo mester determina e discrepancia presenta pa e abogadonan, si nan ta stroba e presentacion di nan. Cada video ta di un otro parcela na Madiki, y di un diferente angulo. Y ta determina cu un video tin miho material cu e otro, pero asina mes ta  opta pa usa tur dos video. Y a bay di acuerdo cu durante e caso, lo presenta e video den sala di corte, riba un pantaya grandi. 

INTERES

Huez a nota tambe cu tin hopi interes pa e caso, tanto pa e victima como e acusadonan y e presencia di tanto hende a demonstra esey. Tabatin asina hopi hende cu no tabatin espacio pa tur hende. Esey a pone huez delibera cu e lo por permiti pa durante tratamento di e caso otro aña,  haci esaki cu ayudo di transmicion di video.  Asina mas hopi hende por mira e caso, sin cu nan mester ta fisicamente den e sala di corte. 

E FECHA DI CASO

A dicidi cu e caso lo tuma lugar durante 2 dia, posiblemente 3, y esey ta dianan 20 y 23 di februari 2026, y un dia di reserva cu ta dia 26. Papiando cu e abogadonan y fiscal, a determina cu mester di 5 ora (2 pa e defensa di e abogadonan di e acusadonan), 2 pa fiscal su rekisitorio, y 1 pa e punto di bista di e abogado di e famia di e victima. Huez a conclui cu mirando tur esaki, a reserva e tres dianan menciona. Riba e prome dia, 20 februari 2026  huez lo haci su preguntanan na e dos acusadornan, lo trata e e situacion personal di e polisnan y victima, y tambe lo pone tempo pa mustra e videonan e dia ey. Riba e di dos dia, 23 di februari, lo  tin e rekisitorio di e fiscal (unda cu lo presenta e demanda) sigui pa e defensa di e abogadonan. Y si mester mas dia, lo usa dia 26 di februari 2026 pa termina e caso.