Cama di hospital na Aruba ta casi semper ocupa, hopi mas halto cu den UE y Merca

ORANJESTAD – Hospital Horacio Oduber (HOH) a registra den 2024 un promedio di ocupacion di cama di mas o menos 87 porciento. E cifra aki ta hopi mas halto cu e promedio den tanto Europa como den Merca. E nivel halto di ocupacion ta mustra un uso intensivo di e capacidad hospitalario na Aruba y ta subraya e presion riba e organizacion di cuido, segun ta bisa den e raport anual di Hospital Horacio Oduber. Pa compara: den Union Europeo, e promedio di ocupacion di cama tabata 77 porciento den 2022, segun dato di Eurostat. Den Merca, e porcentaje aki normal ta entre 62 y 66 porciento, segun raport di Centers for Disease Control and Prevention (CDC) y American Hospital Association. Esaki ta nifica cu e cama na Aruba ta ocupa promedio 10 punto di porciento mas cu na EU y mas cu 20 punto mas cu na Merca. Cu un nivel di ocupacion riba di 85 porciento, HOH ta forma parti di e top internacional den uso di cama hospitalario.

SUBIDA

E cifra ta refleha un subida comparando cu aña anterior. Den 2023, e promedio tabata casi 91 porciento, aunke e raport no ta duna separacion pa seccion.

Segun experto den cuido, un ocupacion di cama mas halto cu 85 porciento ta generalmente considera critico, pasobra e ta laga poco espacio pa absorbe pico den demanda di cuido, manera durante brote di infeccion of accidente. Na otro banda, un ocupacion halto ta demostra un uso eficiente di infrastructura y personal.

HOH ta atribui e presion parcialmente na aumento di caso complejo, un crecemento den e cantidad di admisionnan via Sala di Emergencia (10.041 den 2024) y salida limita di paciente pa causa di lista di espera den casnan di cuido prolonga. Asina, tin algun paciente cu a keda mas largo interna “pa motibo social,” pasobra no tabatin cuido di sigui disponibel den otro luga.

E hospital ta enfatisa cu pa 2025 e lo sigui traha riba ampliacion di capacidad y un flujo mas rapido di paciente, via mehora den infrastructura, miho cooperacion cu cuido basico y apertura planea di un unidad pa admision acuta.