Na Hulanda, partido GroenLinks-PvdA ta scoge nobo lider di fraccion

DEN HAAG - E fraccion di partido hulandes GroenLinks-PvdA ta bay reuni awe dialuna mainta 11.00 pa scoge un nobo presidente di fraccion. Awor cu Marjolein Moorman a indica cu e no ta bai pa e funcion aki pa awor, ta casi sigur cu Jesse Klaver lo bira e nobo lider di fraccion.

Moorman a bisa ayera den su propio podcast De Binnenkamer cu, segun su hopi aña di experiencia, Klaver ta “e mihor” candidato actual pa bira presidente di fraccion.

Mas prome, e numero 2 riba e lista di candidatnan pa eleccion pa Tweede Kamer, Esmah Lahlah, tambe a indica cu e no kier sigui na luga di Frans Timmermans. E declaracion ey no a yega cu sorpresa, despues di loke a pasa cu su solicitacion pa e posision di alcalde na Tilburg.

Experiencia

Tambe a menciona nombernan manera Habtamu de Hoop (numero 8) y Lisa Westerveld (numero 5) den e pasillonan, pero tras di cortina tur hende ta conta cu Klaver.

E hecho cu Klaver ya tin experiencia den negociacion di formacion ta conta hopi. E la gana e experiencia ey na 2017, ora cu e, como lider di GroenLinks, tabata parte den un intento di formacion (cu a faya finalmente) hunto cu VVD, CDA y D66.

Sinembargo, e persona cu ta bai sigui Frans Timmermans, cu a renuncia siman pasa, no ta automaticamente e nobo lider di lista pa e proximo campaña, segun cu e miembro di Parlamento Piri a aclara diahuebs pasa. Moorman a ripiti ayera den su podcast cu Klaver “pa e momento aki” ta e mihor opcion.