Desicion tin cu cay pronto unda e wega di futbol entre Corsou y Jamaica lo bai tuma lugar

WILLEMSTAD – Despues di e enorme destruccion cu horcan Melissa a laga atras den various parti di Jamaica, mesora a cuminza pensa riba unda e wega crucial entre Corsou y Jamaica lo bai tuma lugar. E wega aki ta plania pa tuma lugar dia 18 di november na Kingston, Jamaica.

Segun informacion cu Deporte EXTRA tin disponibel, e prome indicacion ta cu den e siguiente dianan mester evalua si e wega aki lo keda disputa na Jamaica. Lo bai wak con cos ta sigui den proximo dianan pa wak si e wega aki lo mester cambia pa un otro pais. Tin hopi destruccion rond Jamaica, incluyendo algun parti di Kingston. Esaki ta pone cu e chens pa e wega tuma lugar manera plania ta den peliger.

Federacion di futbol hamaiquino lo tin cu keda den contacto cu tanto FFK como FIFA, pa asina por yega na e desicion riba e sitio unda e partido lo hunga. Segun un fuente cu Deporte EXTRA a combersa cu dje, pa mas tarda cuminsamento di otro siman e desicion final mester cay. Pa asina por sa unda e partido clave pa clasificacion pa Mundial 2026 lo bai tuma lugar.