Por lo pronto no ta manda minister plenipotenciario di Aruba pa Hulanda

ORANJESTAD – Por lo pronto, gabinete AVP-FUTURO lo no tin un minister plenipotenciario staciona na Hulanda, pero lo manda un minister di Aruba ora cu ta necesario. Un fuente cerca di e prome minister a confirma esaki pa noticiacla diadomingo. Esaki ta prome biaha cu esaki ta sosode, desde cu Aruba a haya su status aparte na 1986. E motibo principal ta gasto, y cu e decision aki, kier purba reduci esaki. A calcula cu mandando un minister for di Aruba ora cu ta necesario, ta scaca placa. Mesora partido mas grandi di oposicion MEP a ataca e decision y ta yama e biahe di minister Gerlien Croes como un ‘snoepreisje’ di riba 25 mil florin. 

PLAN DI GOBIERNO

E siman aki minister Gerlien Croes a publica un tabel cu ta mustra e calculacion di e gastonan pa tin un minister plenipotenciario di Aruba na Hulanda. Segun e calculacion, e ta riba 300 mil euro pa aña pa pais Aruba, y unda cu si manda un minister di Aruba ora cu mester (lesa: ora cu tin conseho di minister di Reino, Red), e ta sali mas barata. Na September prome minister Mike Eman a bay, y awora ki ta ‘turno’ di minister Gerlien Croes, cu ta minister di Relacionan di Reino tambe. Segun e fuente di e portal aki, ‘asina lo sigui cu diferente minister moving forward’. Partido MEP a publica e informacion di minister Croes, mustrando cu e minister en cuestion lo biaha pa Hulanda diaranson awor, 29 di oktober, y bolbe dia 1 di November. E reunion di conseho di minister ta diabierna awor, 31 di oktober, pa cual Gerlien Croes ta bay pa atende. 

PARTIDO MEP TA PROTESTAE partido mas grandi di oposicion mesora a cataloga e decision aki di Gerlien Croes como un ‘snoepreisje’ caro. Pero e partido ta usa eleccion di Tweede Kamer tambe como motibo pakico e bishita aki ta inecesario. “Kier men dos dia despues (di eleccion di Tweede Kamer)  lo no tin ningun hende pa atende e minister di Aruba atrobe!’, e partido ta bisa den nan reaccion. Ademas e partido ta usa statuut pa ‘bringa’ nan caso. Esaki den sentido cu segun statuut, e minister en cuestion no tin ‘autoridad’ pa atende. ‘Segun Statuut, ta e minister plenipotenciario ta autorisa pa atende e reunion di conseho di minister di Reino’, e partido ta sigui bisa. ‘Y minister presidentnan semper por atende. Den e caso aki ta un otro minister ta bay sin cu tin un motibo urgente’. Loke e partido geel ta disgusta, ta e gasto pa e dos dianan di biahe cu ta 25 mil florin pa e minister so. 

E DECISION ACTUAL TA CUMBINI MASE portal 24ora cu tabata e prome pa raporta e asunto aki, a informa cu ta ‘cumbini’ pa paga un pasashi business class cu hotel pa 3 dia, cu ta un fraccion di e prespuesto actual di un ministerio plenipotenciario. 

RENE HERDE NO TA BAY MAS

E decision ‘nobo’ aki ta algo cu e gabinete actual a bin ta ‘descubri’ despues di haci calculacion. Pasobra mescos cu tur otro gobierno, e gabinete tabatin tur intencion pa tambe manda un minister plenipotenciario, cu lo mester a bira Rene Herdé, actual minister di infrastructura. Ora cu candidato Mike de Meza a haya problema legal cu a strobe di bira minister, e gabinete a opta e ora pa Rene Herde tuma e lugar aki, pero cu mes momento tambe a nifica cu e no ta bira minister mas pa bay Hulanda. Y e ora mester a cuminsa busca otro persona. Pero na caminda, cos a cambia awor, y ‘por lo pronto’, no ta busca un persona mas y ta manda ministernan di Aruba mes. Noticiacla pa awor, a compronde cu lo ‘alternate’ minister, y no ta conoci si esaki lo keda Mike Eman y Gerlien Croes so, of si esaki lo cambia, si resulta cu MEP tin rason cu segun statuut, ta minister president so por atende e reunion, si no tin un minister plenipotenciario. Di otro banda, Noticiacla a compronde cu desde cu e gabinete aki a sinta y cu sr Adi Thijsen a bolbe Aruba, ta Shandra John, hurista na Arubahuis, tabata esun cu tabata encarga pa atende e reunionnan di Rijks Minister Raad. Y si esey tabata legal, lo no mester ta problema pa un otro minister atende esaki awor.