Cuater negoshi local a gana Aruba Signature Experience 2025

ORANJESTAD - Aruba Tourism Authority (A.T.A.) conhuntamente cu Qredits Aruba a anuncia e ganadornan di e di cuater edicion di Aruba Signature Experience cu ta Terawalma, Yuwana Ride, Mimi’s Jewels y Aruba’s Bee Haven & Farm. 

Un iniciativa di A.T.A. y Qredits Aruba, e programa ta enfoca riba yuda empresarionan local of negoshinan nobo, y pa desaroya y promove experencianan unico y di balor halto pa e bishitantenan di nos isla. Durante e ultimo añanan, e programa a yuda negoshinan chikito y nobo drenta exitosamente den e industria turistico di Aruba.Como ganadornan di Aruba Signature Experience 2025, nan lo ricibi un pakete completo di sosten cu ta inclui asistencia financiero, coaching strategico y apoyo den marketing y branding pa amplia nan negoshi y aumenta visibilidad den Aruba su panorama turistico.

TOCANTE E GANADORNAN DI ARUBA SIGNATURE EXPERIENCE 2025

Entre 20 participante, e cuater negoshinan local aki a sobresali, presentando un servicio of producto innovativo, cu ta enrikece e experiencia di bishitantenan. Desde 2021 te cu awor, tin un total di 15 ganador di Aruba Signature Experience, cu ta brinda servicio y experencianan imersivo cu ta pone enfasis riba Aruba su patrimonio cultural, naturalesa, bienestar, romance, creatividad y artesania local.