Hefe di ontvanger na Corsou ta señala minister como responsable pa miyones di impuesto perdi

WILLEMSTAD  – E Ontvanger di Corsou, Alfonso Trona, ta señala e ex minister di Finanza  como responsable pa e perdi di mas cu tres miyon florin den ingreso di impuesto. Den un declaracion publico cu a wordo distribui ayera, Trona ta bisa cu no e mes, sino e ministerio, a para cu e cobransa di reclamonan mas bieu.  

Segun e Ontvanger, e minister a dicidi riba  31 di januari 2023  pa no sigui cobra mas reclamonan di impuesto mas bieu cu di 2017. E desicion ey, segun Trona, a wordo tuma contra e recomendacion di varios instancia, incluyendo College Financieel Toezicht (CFT) ,  Stichting Overheidsaccountantsbureau (SOAB), Sociale Verzekeringsbank (SVB), e ministerio mes di Finanza , y Directie Fiscale Zaken. “E desicion aki tin gran consecuencia,” e la bisa, “pasobra asina un total di mas cu 3.1 miyon florin no por wordo cobra mas.”  

Den su declaracion, Trona ta yama e acusacionnan contra dje “incorrecto y dañino,” pasobra ta liga su nomber directamente cu e suma di placa cu a keda perdi. E ta reacciona asina riba e noticianan reciente tokante e rapportnan di  SOAB , caminda a wordo deskibi irregularidadnan den e Departamento di Impuesto. “Ta facil pa ataca un persona cu no por defende su mes completamente pa motibo di obligacion di secreto,” e ta bisa.  

E Ontvanger ta critica e publicacion di e documentonan di auditoria, caminda segun dje e nomber di un contribuyente a wordo mustra completamente. E ta yama esey un violacion grave di e obligacion di secreto, cu por causa daño di reputacion pa e empresa involucra.  

Trona tambe ta defende su propio actuacion. E ta bisa cu e acuerdo di pago cu e a haci cu contribuyentenan tabata den comber sa cu e Aduana y segun recomendacionnan internacionalmente acepta, manera esnan di e Organisacion pa Cooperacion Economico y Desaroyo (OESO). 

E ta agrega cu e a tuma medida di cobransa a tempo y incluso a logra recauda pago promé cu e desicion ministerial a sera e posibilidad pa sigui cobra.  

E Ontvanger ta finalisa su declaracion bisa cu e no por bai mas den detaye pa motibo di su obligacion di secreto, pero e ta yama e cobertura publico rond e rapportnan di SOAB “unilateral” y “saca for di nan contexto.”