Seleccion di Corsou a practica ayera den Stadion Ergilio Hato

WILLEMSTAD  – Ayera seleccion nacional di futbol di Corsou tabatin un sesion, den cua nan a practica den Stadion Ergilio Hato. Esaki tabata e prome biaha cu nan a train despues di e victoria contra Jamaica diabierna tras di lomba. E sesion di ayera tabata un sesion lebe pa e hungadonan di seleccion nacional.

E hungadonan cu tabata titular contra Jamaica a practica aparte y no a train te final. Esaki pasobra nan a caba di hunga un partido cu hopi intensidad, y Dick Advocaat a opta pa ‘spaar’ nan un tiki. Leandro Bacuna no a train, pasobra e tabatin un lession durante e wega di diabierna. No obstante esaki, e capitan di seleccion di Corsou lo ta cla pa e wega di diamars contra Trinidad and Tobago.

Sontje Hansen y Riechedly Bazoer tambe lo ta disponible pa e proximo wega. Sontje a cuminza e wega anterior pero a bandona e partido na principio di e di dos tempo. Mientrastanto, Bazoer no a hunga mes contra Jamaica, pero lo por hunga diamars awor.

Un biaha mas tabatin bon publico presente pa presencia e training di seleccion. Hopi mucha a bini pa saca portret cu nan hungado faborito.

Awe seleccion di Corsou lo practica cu porta cera pa prepara pa enfrenta Trinidad and Tobago djamars pa 7or di anochi.