Na Corsou, turista ta bula for di baranca na Playa Forti y a fayece

WILLEMSTAD – Polis a informa di un caso lamentabel caminda un persona cu a bin Corsou pa placer a termina den su morto. Segun e raportahe di polis, diasabra 4 di october 2025 rond di mitar di 4 di atardi, Central di Polis a manda un unidad di Barber y Politur pa Playa Forti pa un incidente cu un turista. Na yegada di e unidadnan, nan a topa un homber ta drumi na canto, y cu ya no tabata duna señal di bida. For di investigacion preliminar a sali cla cu e homber aki, cu a resulta ta un turista Mericano, a bai bula for di un baranca na e playa y pa un motibo of otro no a sobrebibi e salto. Doctor di polis, cu tambe a wordo notifica, a confirma morto di e turista. Politur lo sigui cu e demas tramitenan manera ta costumber den e tipo di caso asina.