Huez ta rechasa peticion pa schors detencion di Raily B.

WILLEMSTAD – Ayera durante di e tratamento pro forma di e deteni Raily L. B.(39) cu a tuma luga na Hulanda, relaciona cu e caso di likidacion di periodista Peter R. de Vries, su abogado a pidi pa “schors” detencion di su cliente. Segun e abogado, no tin nada nobo cu a bin den e dosier y loke cu tin te awe contra su cliente no ta acusacionnan grave ni tin nada concreto. Segun e abogado Ministerio Publico tin miedo ku si schors detencion di su cliente, esaki por tin consecuencia ku e acusado por hui. Pero esaki no por ta posible, pa motibo ku Bart ta sintando un castigo di hopi aña kaba y si e mester keda di ‘schors’ pa e caso aki, e ta bai bec Corsou pa caba di sinta su castigo cu falta hopi aña mas.

Ademas e abogado a bisa cu e ta comprende cu ta trata aki di un echo cu tin un castigo di 12 aña of mas mara na dje y cu esaki por choc comunidad. Pero no por tene su cliente cera riba acusacionnan cu no ta concreto. Pa loke ta trata deseonan di investigacion, e abogado a bisa cu ainda e no tin niun deseo di investigacion. Nan ta bai warda testigonan keda scucha na huez comisario, pa asina por deliberacion cu mester bini deseonan di investigacion.

MINISTERIO PUBLICO

Fical a pidi corte pa rechasa e peticion di e abogado. Segun fical e acusacionnan cu tin te awor contra B.ta grave y ainda falta algun investigacion. Ademas nan a tuma nota cu apesar di ta sinta un castigo di hopi aña, Bart a sigui cu actonan criminal y lo no descarta ku e lo bolbe ripiti nan.

TRIBUNAL

E tribunal di Huez ayera a puntra B. si e mes tabatin algo pa bisa. B. a splica cu su abogado a bisa tur cos kaba y cu e ta haci uzo di su derechi pa keda caya. Huez a puntra B. si e ta bai bisa algo durante tratamento di e caso, of e ta keda haci uzo di su derechi pa keda caya, e acusado a bolbe bisa “zwijgrecht”. Huez a puntra e abogado si su cliente lo bai contesta pregunta durante tratamento di e caso. Abogado a splica ku esei nan no a yega na un acuerdo ainda.

RECHASA

Despues di deliberacion e tribunal a bisa cu e caso lo continua dia 16 di december pa mitar di 2 di merdia ora local di Hulanda. E caso lo keda trata un bez mas pro forma pa analiza si tur cos ta cla pa tratamento di fondo cu lo tuma luga den e prome cuartal di 2026. Pa loke ta trata suspencion di e acusado, e tribunal a bisa di ta completamente di acuerdo cu Ministerio Publico.

RAILY B.

Den luna di april di e aña aki, B. a keda traslada for di prizon na Koraal Specht, caminda e tabata sintando castigo di 20 aña den caso di “Hato Shooting”, pa e prizon di maximo seguridad na Hulanda den Extra Beveiligde Inrichting (EBI) Vught.

Despues di un investigacion grandi a sali cla cu B., cu tabata sintando su castigo den prizon Sentro di Detencion y Coreccion Corsou, ta esun cu a plania e morto di De Vries na 2021, na Hulanda. Pues e sospecha contra B. ta ku e a tin un rol di guia den e caso likidacion, for di su cel na Corsou.

B. ta pertenece na e gang di Corsou No Limit Soldiers (NLS), un organizacion criminal cu e tabata miembro den dje na momento di “Hato Shooting” na juli 2014. For di september 2014, e ta cera pa e caso di Hato Shooting.