Venezuela a hasi ehercisionan militar den area costero diasabra

CARACAS - Venezuela a hasi ehercisionan militar den area costero diasabra despues cu Merca a desplega barco na su costa, lanta menasa di invasion. Asina varios medio internacional ta raporta dialuna.  Segun e relatonan, Washington a desplega embarcacion militar na Caribe basa riba estado di combate contra trafico di droga, dirigi na no menos cu tres boto den simannan resien cu supuestamente tabata yena cu droga di Venezuela, resultando den 14 morto. Caracas ta denuncia e desplego mericano, yamando esey un “menasa militar”.

Ehercisionan di diasabra, den estado noroeste Falcon i estado noreste Sucre, a coincidi cu un siman di siman cu gobierno a ordena pa preparacion contra desastre natural. Video di canal estatal VTV a mustra Fuerza Armada Nacional Bolivarian (FANB) moviendo equiponan militar serca Cabo San Roman, un ciudad costero mas o menos 27 kilometro abou di Aruba. Venezuela a cuminza duna entrenamiento militar pa sivinan den medio di tension mas haltu cu Merca. Ehercisionan a inclui canon tira na laman i vehiculonan anfibio desembarca di un boto i move riba tera. Trucknan a transporta misil antiaereo ruso Pechora pa e area.

 E militar a dirigi un ehercisio pa ocupa Isla Patos, un isla inhabita serca frontera cu Trinidad i Tobago, desplegando helicopter i paracaidistanan.

Ademas un operacion anti-droga di FANB den Sucre a involucra mas cu 5.200 soldad, resultando den 30 detencion i decomiso di dies boto, segun General Domingo Hernandez Larez.

Diasabra tambe a tin simulacion di emergencia riba henter pais, cu e prome tabata un simulacion di terremoto, hopi pertinente duna dos temblor di mas cu magnitud 6.0 cu pais a sinti na cumienzo di siman aki.