Gobierno di Hulanda: 10 aña enbez di 5 prome cu por naturalisa

DEN HAAG/ORANJESTAD – Gobierno di Hulanda tin plannan pa prolonga e periodo minimo pa por bira Hulandes via naturalisacion, di 5 pa 10 aña. Esaki ta nifica cu un persona lo tin di biba pa un periodo minimo di 10 aña den Reino di forma ininterumpi y legal prome cu e por presenta su peticion pa bira Hulandes. Conseho di Minister na Hulanda a bai di acuerdo cu e proposicion aki cu a bini di Secretario di Estado Rutte, encarga cu cartera di Husticia y Seguridad. Cu esaki, e gabinete ta duna contenido na e palabra cu a keda pone den programa di gobierno. E informacion aki EXTRA a ricibi for di Hulanda na fin di siman pasa.

Te awor, hendenan cu ta biba legalmente durante 5 aña den Reino, por entrega un peticion pa naturalisacion. Pero e proposicion di ley nobo ta prolonga e termino pa 10 aña. Gobierno di Hulanda ta spera cu e prolongacion aki lo percura cu e nacionalidad Hulandes ta bai pa hendenan cu realmente a construi un relacion duradero cu Hulanda of cu un di e otro paisnan den Reino. E forma aki ta duna mas tempo pa un hende participa completamente y bira parti di un comunidad prome cu e ricibi e honor di nacionalidad Hulandes.

Secretario di Estado Rutte a bisa recien cu: “Cu prolongacion di e periodo di naturalisacion di 5 pa 10 aña, nos ta percura cu hendenan tin un lazo fuerte cu nos den Reino y cu nan ta bon naturalisa, pa nan por participa completamente den comunidad prome cu nan bira Hulandes.”

Tin cu bisa tambe cu no a yega punto final ainda, pasobra e proposicion di ley tin di bai serca diferente organo pa un periodo di dos (2) aña. Ademas, tur hende lo por duna su reaccion riba e proyecto di ley ya cu lo ta disponibel na internet. E reaccionnan lo wordo usa pa mehora y duna mas estructura na e proposicion prome cu e bai na Raad van State pa conseho y finalmente na Tweede Kamer pa su tratamento.