Varios incidente envolviendo turista den fin di siman, incluyendo uno tragico

ORANJESTAD – E fin di siman aki a conoce varios incidente cu turista riba nos isla, tur di haber cu laman. Entre nan tabatin un caso cu a resulta trafigo y fatal. Tabata diasabra pa 12:30 di merdia central di polis a wordo notifica di un incidente patras di Lighthouse. 

Ta asina cu e prome informe ta indica cu lo tin un hende homber cu a haya su mes cu problema den lama.  Central di polis a despacha polis, ambulance tambe brandweer.  Na yegada di e unidadnan por a constata cu lo tin un hende homber wanta na e barancanan.  Di biaha personal di brandweer como polis a bay den accion pa yuda e turista hende homber. = A logra rescata e turista y e personal di ambulance a dune asistencia medico y a transporte pa Dr. Horacio Oduber Hospital pa mas tratamento medico. E turista su situacion ta stabiel.

TURISTA TA BIRA MALO Y HOGA

Den un otro caso, un turista ta bira malo den lama y ta fayece. Tabata diasabra mas tempran, pa mas o menos 4:05 cu central di polis a wordo notifica cu un turista cu ta riba un Catamaran a haya problema den lama y personal di e catamaran bezig cu re-animacion. 

Nan a pone den e dinghy y a trese na canto di lama na altura di Boca Catalina.  Central di polis ta despacha polis como tambe ambulance.  Na yegada di polis ta topa cu personal di e catamaran  cu a bin na canto cu e victima.  Polis a yude cu re-animacion y personal di ambulance a tuma over despues.  Pero lamentablemente despues di un rato no por a haci nada mas turista masculino. Dr.Texier ta yega na e sitio y ta constata morto di e turista hende homber naci na Spaña  di 72 aña. Departamento di Slachtofferhulp a yega na e sitio pa duna e famia asistencia den momentonan dificl aki. Cuerpo Policial ta manda palabra di condolencia na famia di e fayecido.