Ys: Desaroyonan den region entre Merca y Venezuela ta sumamente preocupante

WILLEMSTAD.- Eks minister presidente di Antianan Hulandes, Etienne Ys ta sigui notisia i ta haña e desaroyonan den region entre Merka i Venezuela sumamente preokupante. “Si wak situashon interno na Merka mes tambe ta turbulento miéntras ku Oropa tin ku dil ku e guera na Ukrania, i na Gaza tambe tin guera. Pues, rònt mundu situashon ta preokupante”, Ys ta bisa den e “podcast”, ‘3’or ku Gino’.

E ta mustra ku despues di segundo guera mundial a realisá ku mundu no por sigui asina. A lanta Nashonnan Uní i diferente otro organisashon manera Banko Mundial i NATO, mayoria kolonia na mundu a haña nan independensia, i a traha diferente tratado pa entre otro salbaguardiá derechonan humano. “Pues, a bini un desaroyo ku a krea un órden legal internashonal. Tur hende a biba asina tambe respetando e órden internashonal aki.”

Direpente e situashon aki a kai na awa, Ys ta konstatá. “Rusia no ta respetá niun frontera mas miéntras ku presidente di Merka ta tribi di bisa ku mester aneksá Groenland, Panamakanaal i Canada. E kosnan aki te ku 10 aña pasá tabata inkonsebibel pasobra e órden internashonal no tabata permití esaki.”

Mas aleu Ys ta mustra ku Merka ta pone su marina okupá parti di Karibe i ta tira bòm riba un lancha i bisa ku tin droga aden. “Normalmente ora ta sospechá ku tin un boto ku droga na bordo, ta para e boto aki, subi e boto pa investigá i ora konstatá ku tin droga na bordo ta konfiská esaki i arestá esnan riba e boto pa korte disidí kiko ta pasa ku nan. Pero ningun hende ta bisa algu di loke ta pasando aworakí.”

Ys ta sigui mustra ku Merka a bai asina leu ku el a kondená huesnan di korte internashonal ku a saka órden di detenshon kontra presidente di Israel. “A fris nan kuentanan bankario i nan no por drenta Merka mas. Dje leu ei ta bai ku no ta respetá órden internashonal mas.”

NATO tin un akuerdo ku tur pais miembro ta defendé otro, pero mi ta puntra mi mes si mañan mester tin agreshon kontra u pais miembro kiko posishon di Merka ta, Ys ta sigui bisa. “Mi tin miedu ku NATO no ta dje fuerte ei mas. Rusia a manda asta drone den espasio aéreo di Polonia ku ta un pais miembro di NATO.”NOTA: Texto ta scirbi den papiamento fonetico di Corsou.