“Jimmy Kimmel Live!” lo bolbe den aire riba ABC diamars anochi

LOS ANGELES - E cadena di television ABC a anuncia den un declaracion cu “Jimmy Kimmel Live!” lo bolbe riba television diamars anochi.

“Diaranson pasa nos a tuma e desicion pa suspende produccion di e show pa evita mas inflamacion di un situacion tenso den un momento emocional pa nos pais,” un portavoz di Walt Disney Company, doñonan di ABC, a bisa na CNN. “Nos a tuma e desicion aki pasobra nos a haya cu algun comentario no tabata oportuno i por a percibi como insensitivo. Durante ultimo dia nos a tene dialogonan profundo cu Jimmy, i despues di esey nos a yega na e desicion pa bolbe cu e show diamars anochi.”

“Jimmy Kimmel Live!” a wordo kita den aire abruptamente i pa un tempo indefinido siman pasa despues cu presidente di Federal Communications Commission, Brendan Carr, huntu cu stacionnan afilia a amenaza ABC tocante algun comentario cu Kimmel a hasi den un monologo tocante reaccion di movimiento MAGA despues di asesina di Charlie Kirk.

E show di Kimmel ta duna trabou na entre 200 i 250 empleado. Durante welga di WGA cu a para produccionnan di Hollywood den 2023, Kimmel a yuda su ekipo cu fondo propio. Mas recientemente, ora produccion a wordo stop di nobo durante incendio grandi den Los Angeles na cuminsamento di e aña aki, e show a usa su backlot como centro pa colecta i distribui recurso pa esnan afeta pa desastre.