DVG ta den preparacion pa cu temporada di Influenza

ORANJESTAD - Departamento di Salud Publico cu su Seccion di Malesanan Infeccioso ta ricibiendo diferente yamada di comunidad pa puntra si e vacuna di Influenza pa periodo 2025/2026 a yega caba.

Departamento di Salud Publico-DVG-, pa medio di e comunicado aki, kier informa comunidad y tur grupo di risico cu e vacuna pa cu periodo di 2025/2026 no a yega ainda, pero cu si nos ta spera su yegada pronto. Manera cu esaki yega, nos lo informa comunidad y tur grupo di risico con esaki lo bay wordo distribui den e diferente barionan di Aruba.

Influenza no ta djis un simpel griep. Influenza ta ocasiona tur aña, segun cifranan di World Health Organization (WHO), alrededor di 290 mil morto rond mundo debi na complicacionnan respiratorio. 

Complicacionnan severo mas comun ta varia entre muchanan hopi chikito, adulto cu mas cu un malesa of condicion di salud, adulto mayor riba 60 aña y hende muhe na estado. 

Periodo di influenza tur aña ta core for di luna di October pa Mei, pa cual motibo Departamento di Salud Publico ta hiba su campaña di vacunacion contra Influenza tur aña di nobo durante e periodo aki, tambe pa yuda proteha e grupo di risico di nos comunidad.

Bo kier sa si e vacuna contra Influenza ta consehabel pa bo? Cuminsa acerca bo Dokter di Cas of specialista cu e pregunta aki y keda pendiente pa mas informacion relaciona cu e campaña di vacunacion contra Influenza den e dianan cu ta sigui.