Rosenstand: Declaracion di ‘victimanan’ ta inconsistente y mester declara Siki K, liber di tur cargo

ORANJESTAD – Abogado pa e acusado Siki K, den e caso di sospechoso violacion di dos menor di edad, sr Rosenstand a cuminsa su defensa, sugeriendo cu Ministerio Publico ta actuando sugestivo. Ademas, cu OM no a logra di bin cu prueba cu su cliente ta culpabel, pa cual mester absolve su cliente di tur acusacion. 

CREA DUDA 

E abogado a sigui pa cuestiona e testimonio di tanto e victimanan y e famianan, y tambe argumentando cu ta basa tur cos riba testimonio, sino ningun rapport psicologico y otro profesional. “No tin prueba di dokter, no tin DNA, nada”, e abogado a cuminsa alega. A cuestiona tambe e serie di potret cu a keda presenta como supuesto prueba contra su cliente. Incluyendo video. Y segun e abogado, no tabatin ningun potret of video, cu ta inclui un acto malo di su cliente K. A cuestiona e tempo cu a haci e denuncia, e tempo cu a tuma pa haci esaki desde cu a tende prome biaha di e acusacion, y tambe e interogacion di e polis. 

CREDIBILIDAD 

E abogado a usa un tactica hopi usual den e casonan aki di pedofiel, unda cu ta cuestiona e credibilidad di e victima(nan). Entre nan, cu e victimanan no tabata asina ‘santo’ manera cu ta wordo pinta, y cu nan tabata mas bien problematico, y cu un hamber sexual, y cu tabata cambia guy, na edad hoben, y cu porta e ayudo psicologico mester ta pa e trastorno cu nan a keda cune door di tanto guy cu nan tabatin, envez di acusa su cliente di ta e malechor. Declaracionan contradictorio tambe a wordo cuestiona pa e abogado. 

POTRET SUNU

Cu tabatin potret sunu, tabata berdad pero cu a origina na Hulanda y cu e victima tabatin miedo cu nan lo a yega Aruba. Cu esaki, e abogado ta mustra cu e potretnan no a origina na Aruba, pues no por ta su cliente cu tabata envolvi den esaki. Tambe declaracionan anterior cu ta puntra un di e victimanan, si tabata su cliente cu tabata culpabel, e victima lo a responde cu no. Ademas cu un di e victimanan lo a nenga cu ta e acusado a saca potret y filme. E abogado a bay asina leu, di acusa e victimanan, cu tabata actua asina pa falta di atencion, of pa mustra ‘con hopi muhe nan tabata’. 

HUEZ A PARA E ABOGADODado momento e abogado a bay asina leu di culpa e mayornan pa a fabrica cierto informacion, y pa culpa su cliente di varios cos sin cu ta berdad. Ora cu e abogado a bisa cu e mayornan ‘mester tin berguensa’, e huez a para e defensa mesora. “Mi no ta bay permiti cu bo ta bay tira culpa riba e famianan. Aki no!”, pa cual e abogado a retira su declaracion en cuestion. Na final, e abogado a bisa cu mirando cu no tin nada di prueba, y cu ta fiscal mester prueba su acusacion y cu e fiscal no a logra prueba nada, cu su cliente mester haya absolucion, y tambe cu huez mester suspende su detencion preliminar y laga su cliente bay cas, pa warda su sentencia na cas. Huez na final di e caso, a rechasa e peticion ey, y a mustra cu e acusado por warda su sentencia na KIA.