Fiscal a pidi 10 aña di prizon pa ex chauffeur di ex prome minister

ORANJESTAD – Fiscal vd Biezen diabierna mainta a exigi 10 aña di castigo di prizon pa e sospechoso Siki K., conoci como e ex chauffeur di ex prome minister Wever-Croes pa a e.o. viola 2 menor di edad pa 8 aña largo. Ademas a presenta 8 acusacion den su contra, for di violacion sexual di dos menor di edad, posesion illegal di arma, y tambe pornografia infantil. Durante casi 6 ora, huez a trata e caso aki, y na final a cera e caso, indicando cu dia 10 di October pa cuarto pasa di 8 di mainta, e lo dicta sentencia. Na Noticiacla, e fiscal a splica despues cu e 10 añanan ta incondicional, ya cu no tin castigo incondicional si e castigo ta mas di 4 aña. E castigo ta wordo reduci si cu e tempo cu e la sinta den pre aresto. 

FAMIA PRESENTE 

 Fuera di e acusado K. tabatin famianan di e dos damitanan R. y W. cu ta e victima di violacion sexual. Notable den corte, tabata e presencia di suficiente personal di seguridad di CEA, ubica strategicamente entre e parti di famia di e victima y esnan cu ta pa e acusado. 

E CASO

Huez a cuminsa e caso, pidiendo pa tur partido sea comprensivo pa otro, y pa trata otro cu respect. E ta compronde cu tin emocionan halto y como tal, por spera cierto expresionan emocional durante tratamento di e caso. Asina mes, e la pidi pa no papia door di otro y pa e caso por procesa sin mayor incidente. 

ACUSACION

Fiscal vd BIezen a cuminsa presenta e acusacionan cu ta bastante, un total di 8, unda cu por lo menos 6 ta trata e casonan specifico di violacion sexual di un menor di edad, y a repasa esaki entre varios periodo specific. Mientras cu ta trata algun recien, a resulta cu pa 8 aña largo, for di momento cu e victimanan tabatin 5 y 9 aña respectivamente, nan lo a ser abusa sexualmente, pa e sospechoso K. Ademas ta acusa K. di ta den posicion di pornografia infantile, riba e telefon di dje cu a confisca ora cu a detene na su cas. Y finalmente, cu a encontra por lo menos 1 arma di candela pa cual e no tabatin permiso p’e. Pero a resulta cu e forma con a maneha e otro 5 armanan, tampoco tabata conforme ley. Tambe a trata e parti di daño y perhuicio mesora, pa ambos famia. 

DERECHO DI SILENCIO

Notable tabata cu ora cu huez a cuminsa cu su interogatorio di e hechonan pa cu e sospechoso, e sospechoso a opta pa usa su derecho di silencio y a referi tur cos na su abogado, sr Rosenstand. Tur pregunta, for di e denuncia cu a haci contra dje, su bibamento den trailer ora cu e la bira bisiña di e victimanan,  te na e pregunta si e la mustra e victimanan su arma(nan), K a opta pa keda keto. 

DESCRIPCION GRAFICO DI E ACTONAN

Huez a sigui pa lesa e declaracion di e victimanan, unda cu hopi tabata keto den corte, y e famia emocional. A resulta cu mientras cu e victimanan awor tin 16 y 17 aña, ta for di nan edad di 5 aña cu e prome actonan sexual lo a cuminsa. For di sunchimento, mishimento na partinan priva di e victimanan, a relata detayadamente con tur acto sexual tabata tuma lugar, na unda y con. A resulta, segun testimonio di e victimanan, cu hopi biaha e actonan tabata sosode hunto. Esta e acusado y e dos victimanan. Ora cu un tabata wordo viola, e otro tabata haya orden pa wanta su man, pa e acusado por a haci su acto di violacion. A bira conoci cu e homber lo tabata basila nan, door di invita nan pa su trailer, a cambio di haya wifi y por wak television. Tambe a bira cla, segun testimonio di e victimanan, cu e mama di un di nan tabatin te hasta e yabi di e trailer, unda cu e muchanan por a bay ora cu e acusado no tabata presente. Aki a bira conoci cu dado momento a haya e victimanan hungando cu arma di candela di e acusado, y a te hasta traha un video di dje. 

HUEZ TA CONFRONTA E ACUSADO

No obstante cu e K a opta pa ta keto, huez a sigui su interogatorio. Aki a puntre, con por hustifica e juguetenan sexual haya den su trailer, y tambe si tin un motibo pa cual e damanan ta bisa loke nan ta bisa no ta berdad.  Huez:” Si esaki ta fantasia, ta abo ta e unico cu por bisa esaki. Pakico e damanan ta fabrica e storia y chupe  for di nan dede, awor bo por bisa esey!. “Bo abogado no tabata presente, ami no tabata presente. Abo por so por bisa” e huez a bisa.