JOIA Aruba by Iberostar a presenta su “Star Care Program” pa su empleadonan

ORANJESTAD  – Iberostar Hotels & Resorts a sigui fortalece su compromiso cu empleadonan, introduciendo Star Care, un iniciativa nobo na JOIA Aruba by Iberostar. E programa aki ta diseña pa duna sosten financiero y emocional na e profesionalnan cu ta traha den e hotel y cu tin yiu na Aruba.

Den colaboracion cu YMCA su programa C.A.R.E. (Children Afterschool Recreational & Educational), e iniciativa ta ofrece tarifanan accesibel pa famianan na un luga di cuido confiabel unda e yui por wordo cuida despues di school, di Dialuna pa Diabierna. Asina e empleadonan por balansa miho nan responsabilidadnan profesional cu nan bida familiar cu mas paz mental. 

"Na Iberostar, nos ta kere pa cuida nos empleadonan ta nifica pa cuida pa nan famia tambe. Star Care ta refleha nos compromiso pa sigura cu nos ekipo ta sinti un sosten tanto na trabou manera na cas," a bisa Arnaud Le Lanchon, General Manager di JOIA Aruba by Iberostar. Door di e iniciativa aki, Iberostar ta reforsa su dedicacion pa crea un lugar di trabou cu ta inclusivo, cu ta balora no solamente e crecemento profesional di nos empleadonan, sino tambe nan bida personal y stabilidad familiar.

E programa aki ta parti di e vision mas amplio di Iberostar riba turismo responsable, caminda bienestar di hende y comunidadnan ta na centro di un crecemento sostenibel. Iberostar kier sigui apoya nos empleadonan door di crea un ambiente di trabou caminda empleadonan ta sinti sosteni, balora y orguyoso di forma parti di e ekipo.