Parke Arikok ta gana caso di apelacion contra compania cu kier desaroya Isla di Oro

ORANJESTAD – Corte di apelacion diamars mainta a confirma cu e compania JOB Holding & Management, no mag efectua trabou di construccion riba e loke nos conoce como Isla di Oro na Savaneta. Cu esaki, e ta confirma e sentencia den corte di prome instancia di 2024, cu ta prohibi construccion riba e isla. E compania a apela e sentencia, pa cual caso a tuma lugar na juni ultimo. Awe Corte a dicta e sentencia. 

ARGUMENTO

Segun e tres hueznan, e compania cu kier explora e isla, no a motiva suficiente e motibo pa cual nan kier haci e trabounan cu nan a inicia anteriormente, cu e fin pa desaroya esaki. Ora cu e trabounan a cuminsa aña pasa, varios instancia a protesta incluyendo FPNA (Parke Arikok) como manehador di areanan protehi di Aruba. A pone un paro temporal como orden di huez, cu a evita mas ‘cobamento’ na e isla. Argumento cu e loke ta wordo considera proteccion, no ta completo tampoco, esta cu e mangrove cu ta rondona e isla, si ta proteha, pero e isla no. E argumento aki a wordo bari for di mesa pa hueznan mirando cu henter e area, incluyendo e tereno y awa, ta parti di e area protehi. Y asina tin mas punto cu a pone cu na final, Corte di Apelacion a mantene e sentencia anterior como vigente. Por lesa e sentencia AKI.