Noticiacla a participa na Nederlands Journalistiek Festival na Deventer Hulanda

DEVENTER – Un grupo di entre 13 pa 15 periodista di islanan Caribe di Reino Hulandes, incluyendo Noticiacla, a participa siman pasa durante 3 dia hunto cu periodistanan di henter Hulanda na e Nederlands Journalistiek Festival, organisa pa e organisacion Huis voor de Journalistiek den e ciudad historico di Deventer, na Hulanda. E islanan Aruba, Corsou, Bonaire, y St Maarten tabata bon representa, unda cu Tito Laclé a representa Noticiacla durante e evento aki. 

PROME BIAHA

Ta pa prome biaha cu e festival aki ta wordo organisa pa Huis voor de Journalistiek. Durante dos dia intenso, periodistanan di full Hulanda y esnan invita di Caribe, a participa na festival, unda cu por a scohe entre 75 diferente presentacion, tayer, combersacion y curso, y unda cu un total di 45 persona voluntario a sa di opera e evento den henter e ciudad. 

CONOCE E CIUDAD

Loke tabata hopi unico, ta cu envez di hinca tur hende den un sala henter dia, y laga nan cera eyden pa e cursonan, a opta pa selecta varios sitio den e ciudad, unda cu tabata tene e sessionan. Cada lugar tabatin distancia di entre 5 pa 8 minuut di otro, cu por a cana na pia. Esey kier men cu despues di cada session, bo mester a cana door di e ciudad, experencia e bista di e edificionan historico, rumbo pa bo proximo session. E tabata un forma hopi unico di conoce e ciudad bunita, den apenas dos dia di tempo, di un forma cu di otro forma lo tabata imposibel. Bo por a desconecta di un session, cana, hala rosea y conoce algo nobo, na caminda pa bo proximo cita.

ORGANISA

Mester bisa cu fuera cu e contenido tabata hopi educativo, cada session tabata un otro instrumento periodistico disponible pa adkeri pa bo conocemento, e organisacion tabata uno perfecto. Tur session tabata na ora, bon organisa y presenta, y cu amplio espacio pa conocemento. Y obviamente, e interaccion entre e periodistanan a duna nan tur un manera unico y practico di conoce otro miho, intercambia di idea, y mucho mas. Ta e intencion pa organisa esaki anualmente. Mayoria potret cortesia di ©Lotte Kwant/Fonds BJP.