Autoridad a atende cu candela grandi riba tereno di refineria

SANTA CRUZ - Diaranson den oranan di mainta Central di Polis a wordo notifica cu tin un candela den cura di refineria serca di e panelnan solar na San Nicolas.

A despacha Polis como tambe Brandweer na e sitio. Na yegada a topa enberdad cu un candela bastante grandi. Mirando e situacion di candela y huma OVD di Brandweer a informa Polis pa seguridad di e habitantenan den vecindario pa avisanan pa bay un otro sitio sigur t’e ora cu e situacion di candela ta bou control y despues por bolbe cas bek. 

Polis a cera diferente caminda den vecindario pa asina evita cu mirones y trafico por yega serca pa nan propio seguridad como tambe e unidadnan di emergencia por mobilisa liber. Brandweer a mobilisa mayoria di nan unidadnan y personal na e sitio pa combati e candela como ta Polis. 

A dura un rato pero a logra domina e candela. No a dura muchu cu den oranan di merdia e biento tabata hopi fuerte di cual a pone cu e yerbanan a cende na candela bek. Un otro parti di e tereno cu tabata tin mas yerba seco a pega mesora na candela. Den algun minuut vlamnan grandi compaña cu huma a bolbe bek riba e tereno. E candela tabata asina grandi cu mester a bay over pa traha strategicamente hunto cu otro partners pa seguridad di tanto hende como e refineria.

Di biaha OVD Brandweer conhuntamente cu Officier van Dienst di Polis a reuni hunto cu personal di Crisis Management Office (CMO) pa asina evalua y wak na unda tur mester cera por ehempel caminda y si mester pa pidi habitantenan bandona nan cas pa nan propio seguridad. 

Polis a activa Commando Mobile di e forma aki por a traha hunto strategicamente. Tambe a haci uzo di Drones pa por tin un bista mas amplio di e situacion di candela for di aire.

Despues di oranan largo cu Brandweer a combati e candela pa 4:30 di atardi a bolbe reuni y evalua e situacion. Por a bisa cu e situacion tabata bou control y e habitantenan cu a bandona nan cas por bolbe bek nan cas.

Ta haci un apelacion na e habitantenan cu a wordo afecta pa e huma pa corda habri porta y bentana di cas. Di e forma aki biento por pasa dor di e cas pa ventilacion fresco pa saca e holor di huma. Despues por cera e cas bek ora ta necesario.