Thodé: Politiconan por ta usando 'HOFA' pa crea emocion pa haya sosten politico

ORANJESTAD – Conocido hurista dr Glenn Thodé a sugeri durante e programa Noticiacla LIVE, cu e loke ta sosodiendo aworaki na Aruba cu e discussion si RMR a acepta e Rijkswet HOFA, sin consulta parlamento,  of no, por ta un intento pa haci politica y crea momentum crea confushon y emocion serka electorado pa hisa sosten of sympatia pa e respectivo partidonan. E la splica mes momento cu manera cu Noticiacla a informa anteriormente, ningun momento RMR a aproba e ley di HOFA, como un producto final, sino cu a ‘acepta’ e ley su contendido meramente pa por continua cu e siguiente proceso. Esta acepta e concepto y awor pasa esaki pa e siguiente fasenan legislativo, incluiendo e asina yama ‘internettrayect’. 

CONSTERNACION

Tabata despues cu e noticia a plama cu RMR a ‘acepta’ e concepto, cu partidonan MEP y PPA mesora a cuminsa informa cu e acto aki no ta corecto, y cu no por acepta e acto aki. Y tur dos partido a cuminsa un campana fuerte pa bringa e acto aki. Partido MEP a bay asina leu di inicia un campana di firma, pa protesta contra e hecho cu RMR a acepta e ley, sin cu esaki a pasa Parlamento. Mientras cu partido PPA no a haci un campaña di firma si, e tambe ta basta fuerte den su reaccion pa cu e hecho di diabierna. 

ASOMBRA

“Mi a keda un tiki asombra mi mes tambe pa wak como hurista” Thode a cuminsa bisa, con e politiconan en cuestion a reacciona riba e acto di RMR. Segun e hurista, (tur) leynan ta pasa un proceso. “Bo ta haya cu si ta un iniciativa di Parlamento, Parlamento ta traha e ley, pero ainda e tin cu cana henter un proceso di haya diferente consehonan prome cu parlamento por tratele y aprobele, pa e ta drenta den efecto como un ley” Thodé a sigui splica. Y segun e hurista, e proceso ta simplemente canando su caminda. Y den e caso aki ta un iniciativa di RMR, e proceso ta mescos, pero e ora pa RMR. 

PROCESO

Tur ley ta pasa den un proceso unda cu ta bay di acuerdo cu un concepto.  Y aquí tambe Thodé ta sigura cu e ley en cuestión (HOFA:red) a keda acepta como concepto di ley. “Nan a aproba e textonan aki, hunto cu e memorie van  toelichting, pero e ley no ta cla ainda” Thodé a sigui bisa. 

CONFUSION DEN TRADUCCION?

Segun Thodé, tin confusion, y kisas ta e traduccion di hulandes pa Papiamento, y tin biaha nos tin gana di crea confusion tambe. “Si ta un meta cu nos tin of un interes cu nos tin, por ta e ta beneficia un tiki confusion” e hurista a sigui splica. “E ora nos ta crea confusion”. “Tin biaha berdad, pa metanan p.e. mi tin gana di haya mas sosten di electorado, anto mi ta emociona nan, y cu e emocion, mi ta haya nan sosten. Anto mi ta wak e ta pasa hopi na Hulanda” Thodé a finalisa bisando, splicando e actuacion di e politiconan di e respectivo partidonan MEP y PPA.  E la usa e ehempel di Hulanda riba e tema di asilo politico unda cu politiconan ta haciendo drama riba e tema, siendo cu den comparacion, per capita, Aruba tin mucho mas persona asina, cu Hulanda. Pues, ta haciendo ‘druk’ cu sin cu e ta necesario.